ყველაზე საშინელი წლის ნომინაციაში გამარჯვებული 2020-ის შესახებ მალე სატელევიზიო პროექტს ვიხილავთ.

ამ პროექტს კი არც მეტი, არ ნაკლები, ბოლო წლების ყველაზე გახმაურებული სამეცნიერო ფანტასტიკის ჟანრის სერიალის — შავი სარკის შემოქმედი ჩარლი ბრუკერი უხელმძღვანელებს.

წარმოგიდგენიათ უკვე ხომ, წინ როგორი სანახაობა გველოდება?

ფოტო: Netflix

ამ ჯერჯერობით გასაიდუმლოებული პროექტის შესახებ მსახიობმა ჰიუ გრანტმა ისაუბრა, რომელსაც ერთ-ერთ როლში ვიხილავთ კიდეც: უცნობია, მომავალი პროექტი ფილმი იქნება თუ სერიალი, მაგრამ ჰიუ გრანტის თქმით, ის მოქუმენტური (mockumentary) ჟანრის იქნება — მხატვრული ნაწარმოები, რომელიც ფიქციურ მოვლენებს დოკუმენტური სტილით ასახავს (მაგალითად, ფილმი ბორატი).

"ჩარლი ბრუკერმა 2020-ს შესახებ სცენარი ნეტფლიქსისთვს დაწერა. მასში მე ისტორიკოსის როლს მოვირგებ, რომელიც ამ წელთან დაკავშირებით გამოკითხვას ატარებს", — სამომავლო გეგმებზე საუბრისას აღნიშნა ჰიუ გრანტმა ინტერვიუში.

ჩარლი ბრუკერი შავ სარკეს დასაწყისიდანვე — 2011 წლიდან ხელმძღვანელობს, როცა ის ჯერ კიდევ Channel 4-ის პროდუქცია იყო, ახლა კი ნეტფლიქსისთვის აგრძელებს დისტოპიური სცენარების მოგონებას.

ამ შოუს ჯერჯერობით ბოლო, მეხუთე სეზონი 2019 წლის ივნისში გამოვიდა და მასში ისეთი ცნობილი სახეები ვიხილეთ, როგორებიც არიან მაილი საირუსი, ენტონი მაკი და ენდრიუ სკოტი. უცნობია, როდის ვიხილავთ შემდეგ სეზონს, რადგან ბრუკერმა ჯერ კიდევ პანდემიის დასაწყისში განცხადა, რომ სამყარო ახლა მეექვსე სეზონისთვის ზედმეტად პირქუში იქნებოდა.

როგორც ჩანს, მალე ერთდროულად შემოგვთავაზებს როგორც მომავლის, ისე აწმყოს კოშმარულ ზმანებებს.

ფოტო: Giphy