განცხადებების პორტალ MyMarket-ზე მომხმარებელი წერს, რომ თავის ეზოში მდგარ ხეს ყიდის.

განცხადების მიხედვით, მაგნოლიის ხე სავარაუდოდ 150 წლისაა და ხობში მდებარეობს:

"იყიდება საუკუნე ნახევრის მაგნოლიის ხე. მდებარეობს ხობში, ხეთა. ფასი შეთანხმებით".

განცხადების ავტორმა On.ge-ს უთხრა, რომ ხის გაყიდვა "გაჭირვებამ გადააწყვეტინა" და მას 50 000 აშშ დოლარად აფასებს. ის დასძენს, რომ ხე ნამდვილად ასწლოვანია, თუმცა მყიდველი ჯერ არ გამოჩენილა.

შეგახსენებთ, რომ ბიზნესმენსა და საქართველოს ყოფილ პრემიერმინისტრს ბიძინა ივანიშვილს უკვე მეორე წელია ასწლოვანი ხეები საქართველოს სხვადასხვა ადგილებიდან შეკვეთილში გადააქვს, სადაც დენდროლოგიური პარკის მოწყობას გეგმავს.

2016 წლის მარტში, ივანიშვილის დავალებით, ციხისძირიდან შეკვეთილში ასწლოვანი გიგანტური ტიტას ხე გადაიტანეს. წელს ექსპრემიერის ტერიტორიაზე მაგნოლიას და ფიჭვის ხის გადატანა დაიწყო.