ქართველი მომღერალი მებო ნუცუბიძე, რომელიც თითქმის ნახევარი წელია რაც The BearFox-ის დრამერთან, არჩიბალდ შიოშვილთან, მებო რენარდის პროექტზე მუშაობს, On.ge-ს თავისი კარიერის ბოლო პერიოდზე ესაუბრა.

გასულ წელს მებო პარიზში სასწავლებლად იყო წასული. იქ ყოფნისას ის "ფრანგ მელიად" იქცა და საზოგადოების წინაშე ახალი სახელით, მებო რენარდით, წარსდგა.

2016 წლის დასაწყისში მან გამოუშვა თავისი პირველი ალბომი CIRCLES

"პირველი პატარა ალბომი შევქმენი ზამთარში. მერე მივხვდი, რომ მინდოდა პროექტის სახე მიმეცა ამ ყველაფრისთვის და დაველაპარაკე არჩიბალდს - ბეარფოქსის დრამერს. უკვე გვქონდა ერთად დაკვრის გამოცდილება და ვიცოდი, რომ ძალიან კარგი მუსიკოსი იყო.

ახლა უკვე ერთად ვაკეთებთ მებო რენარდს. არჩი უკრავს დრამზე, უკრავს გიტარაზე, მღერის" - უთხრა მებომ On.ge-ს.

მებოს თქმით, ისინი აქტიურ მუსიკალურ მოღვაწეობას იწყებენ და არჩიბალდთან ერთად Mebo Renard ზაფხულში ახალი EP-ს გამოუშვებს:

"მებო რენარდი არის მრავალფეროვანი პროექტი, რომელიც კიდევ უფრო განვითარდება და მასშტაბური გახდება. მალე დავიწყებთ უკვე ახალი EP-ის ჩაწერას, Betkho's Audio Laboratory-ში - ანუ ჩვენი მეგობრის, ძალიან კარგი პროდიუსერის და ხმის რეჟისორის - ბეთხოს სტუდიაში".

ახალი ალბომი ახლოს იქნება იმასთან, რაც არის ლაივებზე ჩვენი ჟღერადობა. ანუ რაც არის მებო რენარდი - მებო + არჩიბალდი და არა მარტო მებო

Mebo Renard-ის ახალი ალბომი განსხვავებული ჟღერადობის იქნება:

"უფრო ახლოს იქნება იმასთან, რაც არის ლაივებზე ჩვენი ჟღერადობა. ანუ რაც არის მებო რენარდი - მებო + არჩიბალდი და არამარტო მებო.

ახალ ალბომში ჩვენი ისტორიები იქნება, ზოგადად ჩვენი მუსიკა ჩვენი ისტორიებია, ახლა უკვე ორი ადამიანის - მებოს და არჩიბალდის საერთოდ ისტორიები გადატანილი მუსიკაში".

მებო ნუცუბიძის თქმით, მსმენელი მებო რენარდის ახალი ალბომით ივნისის შუა რიცხვებში, ან თვის ბოლოს დატკბება.

მებო და არჩიბალდი უკრაინული ტურნედან 2 დღის წინ დაბრუნდნენ და ახალი ალბომის ჩაწერას დასვენების შემდეგ დაიწყებენ. მანამდე კი თბილისში გამართულ ლაივებზე მიიღებენ მონაწილეობას:

"21 მაისს მაგთი კლუბში ზუსტად იგივე პროგრამას დავუკრავთ ჩვენი ქართველი მსმენელისთვის, რაც უკრაინის ტურნეს ბოლო ლაივზე შევასრულეთ, ამის შემდეგ კი 29 მაისს ფერების ფესტივალზეც ვუკრავთ".

პარიზში გატარებულ დროს მებო მნიშვნელოვან გამოცდილებად აფასებს: "ვუკრავდი სხვადასხვა ადგილებში, ვიცნობდი ახალ ხალხს, მუსიკოსებს და და არა მარტო მუსიკოსებს. ეს ხო მთავარია მუსიკოსისთვის - ახალი გამოცდილება".