25 ნოემბრიდან 10 დეკემბრამდე გაეროს ქალთა ორგანიზაციის (UN Women) ორგანიზებით გენდერული ძალადობის წინააღმდეგ გლობალური კამპანია იმართება. კამპანიის ფარგლებში მსოფლიოს სხვადასხვა კუთხეში დაგეგმილია მრავალგვარი ღონისძიება გოგოებსა და ქალებზე ძალადობაზე ცნობიერების ასამაღლებლად და პრობლემის აღმოსაფხვრელად.

საქართველოს კინემატოგრაფიის ეროვნული ცენტრი კამპანიას სპეციალური პროგრამით უერთდება — მის ფარგლებში ეროვნული კინოცენტრი თემატური ქართული ფილმების ონლაინ ჩვენებებს მოაწყობს. ჩვენებები 27, 28 და 29 ნოემბერსაა დაგეგმილი, ისინი ლაივრეჟიმში 22 საათიდან, კინოცენტრის ოფიციალურ ფეისბუქგვერდზე გაიმართება.

სანამ მამა დაბრუნდება (2018)

კამპანიის ფარგლებში დაგეგმილი პირველ ფილმს — სანამ მამა დაბრუნდება — 27 ნოემბერს აჩვენებენ. დოკუმენტური ნამუშევრის რეჟისორი მარი გულბიანია და მისი მსოფლიო პრემიერა 2018 წელს, გაერთიანებულ სამეფოში, შეფილდის დოკუმენტური ფილმების ფესტივალზე მოეწყო.

80-წუთიან ფილმში ორი ქისტი მეგობრის — იმანის და ევას — ისტორიაა ნაჩვენები. ისინი პანკისის ერთ-ერთი სოფლის ჩაბნელებული საკლასო ოთახის დახეთქილ კედელზე პირველად ნახავენ ფილმს. კინემატოგრაფიულ გამოცდილებას პირველად ნაზიარები გოგოები კამერას ხელში იღებენ და მათი ყოფის ასახვას ეკრანზე თავად იწყებენ. როგორც ფილმის IMDb-ის აღწერაში ვკითხულობთ, "გოგოები რადიკალიზმით მოცულ ხეობაში იზრდებიან, სადაც ადამიანებს მუდამ იმის შიში აქვთ, მათმა ახლობლებმა ღმერთის სახელით საკუთარი თავის შეწირვა არ გადაწყვიტონ".

გაიღიმეთ (2012)

28 ნოემბერს რუსუდან ჭყონიას რეჟისურით და სცენარით შექმნილი ფილმის, გაიღიმეთ, ყურების შესაძლებლობა გექნებათ, რომლის მსოფლიო პრემიერაც ვენეციის კინოფესტივალზე შედგა. კინოსურათში ია სუხიტაშვილი, ნანა შონია, ოლიკო ბაბლუანი, მაკა ჩიჩუა, შორენა ბეგაშვილი და გია როინიშვილი მონაწილეობენ.

ფილმის სიუჟეტით 10 ქალი, რომელთაგან უმეტესობა დაბალი სოციალური ფენის წარმომადგენელია, დედების სილამაზის კონკურსის და პრიზად დაწესებული ბინისა და სოლიდური თანხის მოსაგებად იბრძვის. განსაკუთრებულ დრამატულობას კონკურსს ის ფაქტი სძენს, რომ მონაწილეებს შორის პარლამენტარის ცოლიცაა.

დედე (2017)

ეროვნული კინოცენტრის მიერ გაეროს კამპანიის ფარგლებში მაყურებლისთვის შეთავაზებული ბოლო ფილმი დედე იქნება, რომლის ჩვენებაც 29 ნოემბერსაა დაგეგმილი. ფილმის რეჟისორი მარიამ ხაჭვანია, სცენარი კი მას და ვლადიმერ კაჭარავას ეკუთვნით. კინოსურათში მთავარ როლებს გიორგი ბაბლუანი და ნათია ვიბლიანი ასრულებენ. გადაღებები სვანეთში, ყაზბეგსა და კასპში მიმდინარეობდა. საათნახევრიანი მხატვრული ფილმის მსოფლიო პრემიერა ჩეხეთში, კარლოვი-ვარის კინოფესტივალზე შედგა, სადაც მან ჟიურის ჯილდოს მოპოვებაც შეძლო.

დედე სვანი გოგოს ისტორიას გვაჩვენებს, რომელსაც საკუთარი ნების საწინააღმდეგოდ აქორწინებენ, მას კი სიყვარულისთვის ბრძოლა უწევს. ფილმში საუბარი, მეტწილად, სვანურ ენაზე მიმდინარეობს.

გაეროს გენდერული ძალადობის წინააღმდეგ მიმართული 16-დღიანი გლობალური კამპანია სწორედ დედეში წარმოჩენილი და მისი მსგავსი პრობლემების აღმოფხვრას ეხება — ესაა ძალადობა ქალებსა და გოგოებზე, რომელიც განსაკუთრებით მწვავე გახდა კორონავირუსის პერიოდში.

კამპანია 1991 წლიდან იმართება, მასში მონაწილეობას კი მსოფლიოს 100-ზე მეტ ქვეყანაში უამრავი ორგანიზაცია იღებს. წლევანდელი კამპანიის შესახებ დამატებით ინფორმაციას გაეროს ქალთა ორგანიზაციის ვებგვერდზე შეგიძლიათ გაეცნოთ.