უწყებათაშორისმა საკოორდინაციო საბჭომ კორონავირუსის გავრცელების საპრევენციო ღონისძიებები გამკაცრა და ახალი შეზღუდვები დააწესა. ამის პარალელურად პრემიერმინისტრმა, გიორგი გახარიამ იმ სოციალურ-მიზნობრივ დახმარებებზე ისაუბრა, რომელიც შეზღუდვების პარალელურად გაიცემა. კერძოდ:

• პრემიერის თქმით, დასაქმებული, ვინც პანდემიის პერიოდში სამსახური დაკარგა პირველი იანვრიდან 200-ლარიან დახმარებას კვლავ მიიღებს. ჯამში მოქალაქე 1 200 ლარს 6 თვის განმავლობაში მიიღებს. ეს პირველი იანვრიდან თავიდან დაიწყება და დამატებით 6 თვის განმავლობაში გაგრძელდება.
• 300-ლარიანი სოციალური დახმარება დაწესდება თვითდასაქმებულთათვისაც. გახარიას განმარტებით, ამ ადამიანებს საჭიროების შემთხვევაში, სახელმწიფო სესხის გადავადებაშიც მიეხმარება.
• ამასთან, 18 წლამდე შშმ და მკვეთრად გამოხატული შშმ პირებისთვის 100-ლარიანი დახმარებები 6 თვით გახანგრძლივდება.
• სოციალურად დაუცველ ოჯახებს, რომელთაც 65 ათასიდან 100 ათას ქულამდე აქვთ, სახელმწიფო 6 თვის განმავლობაში 100-ლარიან დახმარებას დაუნიშნავს.
• გარდა ამისა, დამატებით 0-დან 100 000 ქულამდე მქონე ოჯახები, ვისაც ჰყავთ 3 ან მეტი არასრულწლოვანი, 16 წლამდე შვილი, 6 თვის განმავლობაში ყოველთვიურად სახელმწიფოს მხრიდან მიიღებენ 100 ლარის ოდენობის დახმარებას.
• ასევე, სესხების გადავადებაში დაეხმარებიან თითოეულ ინდ. მეწარმეს ან ფიზიკურ პირს, რომელთა ობიექტებიც შეზღუდვების გამო დაიხურა.

რაც შეეხება ბიზნესს, გახარიას განცხადებით, ბიზნეს სექტორისთვის საშემოსავლო გადასახადის სუბსიდირება 6 თვით გაგრძელდება. ამასთან, პრემიერის თქმით, ტურიზმის სექტორში დასაქმებულთათვის 2021 წელს ქონების გადასახადი გაუქმდება, ხოლო საშემოსავლო ჩამოიწერება. ასევე, ყველა სარესტორნო დაწესებულებას, რომელსაც საბანკო სასესხო ვალდებულება გააჩნია, სახელმწიფო 6 თვის განმავლობაში დაუსუბსიდირებს საპროცენტო განაკვეთს.

გარდა ამისა, გახარიამ დღეს დაადასტურა ძველი ინფორმაცია, რომ 4 თვის განმავლობაში კომუნალური გადასახადები როგორც ელექტროენერგიის, ასევე ბუნებრივი აირის, დაიფარება.

პრემიერმინისტრის თქმით, ეს ერთჯერადი დახმარება ყველა იმ მოქალაქემ, ვისთვის იგი განსაზღვრულია, 30 დკემბრამდე უნდა მიიღოს. მისივე განცხადებით, დახმარების ეს პაკეტი, სახელმწიფოს მილიარდ 100 მილიონი ლარი დაუჯდება.

ფინანსთა მინისტრის, ივანე მაჭავარიანის თქმით კი, 200 ლარიანი დახმარება, რომელიც 6 თვის განმავლობაში გაგრძელდება, იანვრიდან შევა ძალაში.

გაიგეთ მეტი ახალ შეზღუდვებზე:

• რა შეზღუდვები იმოქმედებს ქვეყანაში — სრულად
• გადაადგილების შეზღუდვა გამკაცრდა — 28 ნოემბრიდან გარეთ გასვლა 21:00 საათიდან აიკრძალება
• 28 ნოემბრიდან თბილისში, ბათუმსა და 6 დიდ ქალაქში ღია და დახურული ბაზრობები დაიხურება
• 28 ნოემბრიდან თბილისში, ბათუმსა და კიდევ 6 ქალაქში მუნიციპალური ტრანსპორტი აღარ იმუშავებს
• გადაადგილების შეზღუდვა მხოლოდ ახალი წლისა და შობის ღამეს არ იმოქმედებს
• 28 ნოემბრიდან რესტორნები და კვების ობიექტები მთლიანად გატანის სერვისზე გადავლენ
• 28 ნოემბრიდან ფიტნესი და საცურაო აუზები ისევ დაიხურება
• 28 ნოემბრიდან თბილისში, ბათუმსა და 6 ქალაქში საბავშვო ბაღები მუშაობას შეაჩერებენ
• ჩერდება სათხილამურო ტრასები და საბაგიეროები — რა შეზღუდვები დაწესდა ზამთრის კურორტებზე