ერთიანი ნაციონალური მოძრაობის წევრის, სალომე სამადაშვილი თქმით, შეთანხმების მიღწევა ქართული ოცნების ინტერესში უფროა ვიდრე ოპოზიციის. როგორც მან რუსთავში 2-ის ეთერში, ოპოზიციონერი ლიდერების აშშ-ს ელჩთან შეხვედრის შემდეგ განაცხადა, იმ შემთხვევაში თუ მმართველი პარტია არ წავა დათმობაზე, ქვეყანაში მივიღებთ კვაზი დიქტატურას.

"ქართულ ოცნებას არ უწერია ამ ქვეყანაში ხელისუფლების შენარჩუნება, არანაირ კონფიგურაციაში. შეთანხმების მიღწევა დღეს, პირდაპირ რომ გითხრათ, უფრო დიდ ინტერესშია ქართული ოცნებისთვის, ვიდრე, ოპოზიციისთვის. იმიტომ, რომ ქართული ოცნება სხვა შემთხვევაში კარგავს უბრალოდ ყველაფერს, ელემენტარულად კარგავს შანსს, რომ ხელისუფლებიდან წასვლის შემდეგ, რამე დარჩეს საერთოდ აი ამ პოლიტიკური პროექტისგან, პარტია თუ არ ვიცი, ეს რა სახით იქნება [...]

მე მინდა საზოგადოებას ესმოდეს, რომ შეთანხმების მიუღწევლობა ამ შემთხვევაში ნიშნავს ერთპარტიული, კვაზი დიქტატურის გზით [სიარულს]. კვაზი დიქტატურას იმიტომ ვიძახი, რომ დიქტატურას ჩვენს ქვეყანაში არავინ არ დაუშვებს, საბოლოო ჯამში. ის უმწვავესი შეჯახება, რაც მოხდება ქართულ საზოგადოებასა და ბიძინა ივანიშვილს შორის, დასრულდება აბსოლუტური კრახით ივანიშვილისთვის", — განაცხადა სალომე სამადაშვილმა.

31 ოქტომბერს გამართული საპარლამენტო არჩევნების შედეგებს ოპოზიცია არ აღიარებს. მათ უარი თქვეს მეორე ტურში მონაწილეობაზე, რომელიც 21 ნოემბერს ჩატარდა, და არ აპირებენ პარლამენტში შესვლას.

პოლიტიკური კრიზისიდან გამოსავლის საპოვნელად აშშ-სა და ევროკავშირის ელჩების შუამავლობით მმართველი და ოპოზიცურ პარტიებს შორის მოლაპარაკებები მიმდინარეობს. უკვე გაიმართა მოლაპარაკებების ორი რაუნდი. ოპოზიცია ამბობს, რომ ქართულ ოცნებას წარუდგინეს კონკრეტული წინადადება და შემდეგ ნაბიჯს სწორედ მმართველი პარტიისგან ელიან.

გაიგეთ მეტი: