თბილისის მერიის პრესსამსახურის განმარტებით, კეკელიძის ქუჩაზე ანტიჰომოფობიური პლაკატის ჩამორეცხვის მიზეზი გახდა ის, რომ არქიტექტურის სამსახურიდან მის გაკვრაზე ნებართვა არ იყო გაცემული.

პლაკატი კეკელიძის ქუჩაზე მხატვარმა მუსია ქებურიამ 17 მაისს, ჰომოფობიასა და ტრანსფობიასთან ბრძოლის დღეს გააკრა.

მერიის პრესსამსახურის თანამშრომელმა ლილე ხმალაძემ On.ge-ს განუმარტა მიზეზი, რის გამოც დასუფთავების სამსახურმა პლაკატი ჩამორეცხა:

"ეს სტენსილი იყო გაკეთებული კეკელიძის ქუჩაზე ხიდის შიდა ფასადზე. როცა ხიდზე, ნაგებობაზე და ა.შ. უნდა გაკეთდეს პლაკატი, სტენსილი, ნახატი და ა.შ. ეს უნდა შეთანხმდეს არქიტექტურის სამსახურთან. ვთქვათ, როგორც იყო კავკაზუსის რეკლამა გვირაბში, თანხმდება არქიტექტურის სამსახურთან და ის აწესებს ვადებს.

ეს კონკრეტული სტენსილი რომ უნდა განთავსებულიყო ხიდზე, ეს არ არის შეთანხმებული არქიტექტურის სამსახურთან და ამაზე არ იყო ნებართვა გაცემული.

ეს იყო ჩამორეცხვის მიზეზი?

თუ უნდა მოხდეს პლაკატის, სტენსალის ან რეკლამის გაკვრა ადმინისტრაციული ერთეულის ნებისმიერ ნაგებობაზე, ეს იქნება შენობა, ხიდი, გვირაბი თუ ა.შ. უნდა ნებართვა გასცეს არქიტექტურის სამსახურმა. როცა ეს არ ხდება, ანუ ნებართვა არ იყო გაცემული და არც არავის მოუმართავს ამისთვის, აქ უკვე მოქმედებას იწყებს ადმინისტრაციულ სამართალდარღვევათა კოდექსის 150-ე მუხლი, რაც თვითმმართველი ერთეულის იერსახის დამახინჯებას გულისხმობს. შესაბამისად, რადგან არ იყო ნებართვა, უკვე გასუფთავდა ამ ხიდის შიდა ფასადი. ასე ხდება სხვა შემთხვევებშიც. რადგან ეს იყო კოდექსის დარღვევა, ამიტომ მოხდა გასუფთავება.

გვერდით არსებულ წარწერებსა და სტენსილებზე გაცემულია ნებართვა?

იცით, თუ ეს გაინტერესებთ, შეგიძლიათ მიმართოთ არქიტექტურის სამსახურს და ის გაგირკვევთ მთელი თბილისის მასშტაბით რაც გაინტერესებთ.

ჩვენს კითხვაზე, რამე დამატებითი სანქციის გატარებას თუ აპირებენ პლაკატის ავტორის წინააღმდეგ, თბილისის მერიის პრესსამსახურმა გვითხრა, რომ როდესაც ვერ ხდება უნებართვოდ გაკრული პლაკატის ავტორის იდენტიფიცირება, ამ შემთხვევაში მერია თავისი ძალებით ახდენს მის გასუფთავებას: "ამ შემთხვევაში პლაკატი უკვე ჩამოფხეკილია".

მხატვარმა მუსია ქებურიამ ანტიჰომოფობიური პლაკატი კეკელიძის ქუჩაზე 17 მაისს, ჰომოფობიასა და ტრანსფობიასთან ბრძოლის დღეს გააკრა. როგორც მხატვარმა On.ge-ს განუცხადა, ის ამ პლაკატით ასევე გამოეხმაურა იმ აქტივისტების დაკავებას, რომლებიც საპატრიარქოს კედელზე აპირებდნენ წარწერების გაკეთებას და რომლებსაც პოლიცია აგრესიულად მოექცა.

თბილისის ქუჩებში - შენობების კედლებზე, ღობეებსა და ტროტუარებზე, ხშირად შეხვდებით წარწერებსა და პლაკატებს, რომელსაც წლებია, არავინ შლის.

დასუფთავების სამსახურმა კეკელიძის ქუჩაზე ანტიჰომოფობიური პლაკატი ჩამორეცხა

განახლება: სტატიის გამოქვეყნებიდან 1 საათის შემდეგ დაგვიკავშირდა თბილისის მერიის ზედამხედველობის სამსახურის თანამშრომელი და გვითხრა, რომ პლაკატის ჩამორეცხვაზე ბრძანება მათ არ გაუციათ და თბილისის მერიის დასუფთავების თანმშრომელმა ანტიჰომოფობიური პლაკატი სავარაუდოდ ადგილობრივი მოსახლეობის მოთხოვნის შემდეგ ჩამორეცხა.