ევროპული საქართველოს ლიდერის, გიგა ბოკერიას შესაფებისთ ბიძინა ივანიშვილის საარჩევნო ყუთისთვის დეზინფექციის ჩატარება მოსახლეობის მიმართ არის "სამარცხვინო და შეურაცხმყოფელი დამოკიდებულება".

ბოკერიამ აღნიშნა, რომ იმ სისტემისთვის, რომელიც ივანიშვილმა შექმნა, ჩვეულებრივი მოქალაქეების, ადამიანების სიცოცხლეს, ჯანმრთელობასა და ინტერესებს ფასი არ აქვს.

"ეს არის გამოვლინება ყველაზე უფრო სამარცხვინო, შეურაცხმყოფელი ჩვენი საზოგადოებისათვის, უპატივცემულო ყველა მოქალაქის მიმართ, ამ დამოკიდებულების, რომ ჩვენ გვყავს ადამიანი, რომელიც კანონზე მაღლა დგას და რომლის ჯანმრთელობასაც აყენებენ უფრო წინ, ვიდრე სხვა ყველა მოქალაქის ჯანმრთელობას, უფლებებსა და ინტერესს", — განაცხადა ბოკერიამ.

უბანზე, სადაც ქართული ოცნების ლიდერმა, ბიძინა ივანიშვილმა ხმა მისცა, მის მისვლამდე ორი კაბინა მისივე დაცვის წევრმა სადეზინფექციო ხსნარით გაწმინდა. როგორც საქართველოს ახალგაზრდა იურისტთა ასოციაციის ანალიტიკოსი, თამარ ხუხია On.ge-სთან განმარტავს, ეს ცალსახად დარღვევა იყო. თუმცა საარჩევნო უბნის კომისიის თავმჯდომარე ამტკიცებდა, რომ კანონი არ დარღვეულა. მისი თქმით, მსგავსი აკრძალვა კოდექსში არ წერია.

კანონმდებლობის მიხედვით, არჩევნების დღეს უბანზე არაუფლებამოსილი პირის შესვლა არ შეიძლება. კერძოდ, საარჩევნო კოდექსის მე-8 მუხლის მე-16 პუნქტი აზუსტებს, ვის აქვს საარჩევნო უბანზე ყოფნის უფლება და მათ შორის, პირადი დაცვა არ არის.

On.ge-სთან საუბრისას საიას ანალიტიკოსი თამარ ხუხია აცხადებს, რომ კაბინაში დაცვის შეშვება დარღვევაა და განმარტავს, რომ ამისთვის არსებობს უფლებამოსილი პირი, რომელიც კაბინებს სველი წესით ალაგებს. კერძოდ, მისი თქმით, COVID-19-ის რეგულაციებიდან გამომდინარე უბანზე ყოფნის უფლება დამლაგებელსაც მიეცა, რომელიც სველი წესით ამუშავებს ზედაპირებს.