პარტია გირჩის ლიდერის, ზურაბ ჯაფარიძის თქმით, სტაბილურად "ნეხვში" ჯდომა კარგი არ არის. ასე გამოეხმაურა იგი თავდაცვის მინისტრის, ირაკლი ღარიბაშვილის განცხადებას, რომ მან არჩევნების მეორე ტურში ხმა ქვეყნის "სტაბილურობასა და მშვიდობას" მისცა.

"დაბრუნებულები არიან შევარდნაძის პერიოდში, როცა კორუპციაში ვიხრჩობოდით, არანირი პერსპექტივა არ არსებობდა და მართლა გამოუვალ მდგომარეობაში ვიყავით. მაშინ ჰქონდა შევარდნაძეს ეგ მესიჯი, რომ მთავარია სტაბულურობა იყოს და მეტი არაფერიო. სტაბილურობა კარგია, მშვიდობა კარგია, ცხადია, მაგრამ წუმპეში ჯდომას არანაირი აზრი არა აქვს. სტაბილურად ნეხვში თუ ზიხარ, ეგ კარგი არ არის. იქიდან უნდა ამოძვრე და ახლა ეს ქვეყანა არის ამოსაძვრენი. ახლა ამ არჩევნებზე იყო მაგის შანსი", — განაცხადა ჯაფარიძემ TV პირველის ეთერში.

დღეს, 21 ნოემბერს 17 მაჟორიტარულ ოლქში არჩევნების მეორე ტური იმართება, რომელსაც ოპოზიცია ბოიკოტს უცხადებს. ბარიერგადალახულმა ოპოზიციურმა რვა პარტიამ მაჟორიტარული არჩევნების მეორე ტურში მონაწილეობაზე უარი თქვა და განაცხადა, რომ არც პარლამენტში შევა. ტექნიკურად მათი სახელები ბიულეტენებში ჩაწერილი იქნება, თუმცა, როგორც ოპოზიციაში ამბობენ, მათ არც საარჩევნო კამპანია ჩაუტარებიათ და საჯაროდაც მოქალაქეებს მოუწოდებენ, არ წავიდნენ არჩევნებზე.

არჩევნების დღეს ოპოზიცია აქციის ჩატარებას გეგმავდა, თუმცა საბოლოოდ მათ გადაწყვიტეს, რომ საპროტესტო ღონისძიებებს არ ჩაატარებდნენ და სრულ იგნორირებას გამოუცხადებდნენ.

ამ ხნის განმავლობაში მმართველ გუნდში ამტკიცებდნენ, რომ ოპოზიცია მეორე ტურისთვის კოორდინატორებისა და ამომრჩევლის მობილიზებას აპირებდა.

ამასთან, პოლიტიკური კრიზისიდან გამოსავლის საპოვნელად აშშ-სა და ევროკავშირის ელჩების შუამავლობით მმართველი პარტიისა და ოპოზიცურ პარტიებს შორის მოლაპარაკებები მიმდინარეობს. ოპოზიციაში აცხადებენ, რომ მათი მოთხოვნები არ იცვლება და რიგგარეშე არჩევნებს მოითხოვენ. თავისი პოზიციების დათმობაზე უარს ამბობს ხელისუფლებაც. როგორც ქართულ ოცნებაში განმარტავენ, რიგგარეშე არჩევნების ჩატარებას არც განიხილავენ.