"ვნერვიულობ [დავით] სერგეენკოზე. რას შვება იმ დაძაბულ ბრძოლაში?" — ასე ირონიულად გამოეხმაურა პარტია მოქალაქეების ლიდერი, ალეკო ელისაშვილი მაჟორიტარული არჩევნების მეორე ტურს, რომელსაც იგი ბოიკოტს უცხადებს.

"გავგიჟდები, რომ ვერ გაიმარჯვოს... აბა, თქვენ იცით, ბატონო დავით, საბურთალო თქვენთანაა... დარწმუნებული ვარ, სწორედ თქვენ იქნებით კომპარტიის 27-ე ყრილობის დელეგატი საბურთალოდან", — წერს ელისაშვილი ფეისბუქზე.

საბურთალოს ოლქში მეორე ტურში ქართული ოცნების კანდიდატი დავით სერგენკო და მოქალაქეების ლიდერი, ალეკო ელისაშვილი გავიდნენ. თუმცა ელისაშვილი, როგორც სხვა ოპოზიციური პარტიები, არჩევნებს ბოიკოტს უცხადებენ და მონაწილეობას არ იღებენ.

დღეს, 21 ნოემბერს 17 მაჟორიტარულ ოლქში არჩევნების მეორე ტური იმართება, რომელსაც ოპოზიცია ბოიკოტს უცხადებს. ბარიერგადალახულმა ოპოზიციურმა რვა პარტიამ მაჟორიტარული არჩევნების მეორე ტურში მონაწილეობაზე უარი თქვა და განაცხადა, რომ არც პარლამენტში შევა. ტექნიკურად მათი სახელები ბიულეტენებში ჩაწერილი იქნება, თუმცა, როგორც ოპოზიციაში ამბობენ, მათ არც საარჩევნო კამპანია ჩაუტარებიათ და საჯაროდაც მოქალაქეებს მოუწოდებენ, არ წავიდნენ არჩევნებზე.

არჩევნების დღეს ოპოზიცია აქციის ჩატარებას გეგმავდა, თუმცა საბოლოოდ მათ გადაწყვიტეს, რომ საპროტესტო ღონისძიებებს არ ჩაატარებდნენ და სრულ იგნორირებას გამოუცხადებდნენ.

ამ ხნის განმავლობაში მმართველ გუნდში ამტკიცებდნენ, რომ ოპოზიცია მეორე ტურისთვის კოორდინატორებისა და ამომრჩევლის მობილიზებას აპირებდა.

ამასთან, პოლიტიკური კრიზისიდან გამოსავლის საპოვნელად აშშ-სა და ევროკავშირის ელჩების შუამავლობით მმართველი პარტიისა და ოპოზიცურ პარტიებს შორის მოლაპარაკებები მიმდინარეობს. ოპოზიციაში აცხადებენ, რომ მათი მოთხოვნები არ იცვლება და რიგგარეშე არჩევნებს მოითხოვენ. თავისი პოზიციების დათმობაზე უარს ამბობს ხელისუფლებაც. როგორც ქართულ ოცნებაში განმარტავენ, რიგგარეშე არჩევნების ჩატარებას არც განიხილავენ.