ამერიკის შეერთებული შტატების დედაქალაქში დღეს გაიმართება დონალდ ტრამპის ინაუგურაცია, რომელიც უკვე ოფიციალურად გახდება ქვეყნის 45-ე პრეზიდენტი. ინაუგურაციის ცერემონია თბილისის დროით 20:30 საათზე დაიწყება და რამდენიმე საათს გაგრძელდება.

ინაუგურაციასთან დაკავშირებული ოფიციალური ღონისძიებები ჯერ კიდევ 19 იანვარს დაიწყო. ტრადიციისამებრ, ტრამპმა, როგორც მომავალმა პრეზიდენტმა, არლინგტონის ეროვნულ სასაფლაოზე პატივი მიაგო ქვეყნისთვის დაღუპულ ჯარისკაცებს, შემდეგ გაიმართა საზეიმო კონცერტი და ვახშამი.

20 იანვრის დილის განრიგში მითითებულია ტრამპის საუზმე ოჯახთან, შემდეგ კი ლოცვა. აღნიშნულის შემდეგ დონალდ ტრამპი და ბარაკ ობამა ერთმანეთს შეხვდებიან თეთრ სახლში და პენსილვანიის ავენიუს გავლით ერთად გაემართებიან კაპიტოლიუმისკენ, სადაც იმართება ინაუგურაცია.

რაც შეეხება უშუალოდ ინაუგურაციის ცერემონიას, ღონისძიებას დაესწრება დონალდ ტრამპის კონკურენტი ჰილარი კლინტონი ქმართან, ბილ კლინტონთან ერთად, რომელიც აშშ-ს 42-ე პრეზიდენტია. ტრამპის ინაუგურაციაზე ამერიკის ჰიმნს შეასრულებს America's got talent-ის (ამერიკული ნიჭიერი) 16 წლის ვარსკვლავი ჯეკი ევანჩო. ცერემონიაზე ტრამპს დალოცავს 6 რელიგიური ლიდერი, რის შემდეგაც დაიწყება უშუალოდ ფიცის დადების ცერემონია. დონალდ ტრამპი საპრეზიდენტო ფიცს ორ ბიბლიაზე ხელის დადებით შეასრულებს - ერთი მისი ბავშვობისდროინდელი ბიბლიაა, მეორე კი - ლინკოლნის ბიბლია. სწორედ აღნიშნული ბიბლია გამოიყენა ობამამ ფიცის დადების დროს.

ფიცის დადების ცერემონიის დასრულების შემდეგ უკვე პრეზიდენტი დონალდ ტრამპი და ვიცე-პრეზიდენტი მაიკ პენსი პენსილვანიის ავენიუზე გაუძღვებიან სამხედრო მარშს. 20 იანვრის საღამოს, მას შემდეგ რაც ტრამპი თეთრ სახლში ოფიციალურად შევა, გაიმართება ორი საზეიმო მიღება. ინაუგურაციასთან დაკავშირებული რამდენიმე ღონისძიება გაგრძელდება 21 იანვარსაც.

ინაუგურაციის პარალელურად დაგეგმილია არაერთი საპროტესტო აქცია. ინაუგურაციის ცერემონიის უსაფრთხოებას უზრუნველყოფს ფედერალური სამსახურების 30 ათასამდე თანამშრომელი.

On.ge ლაივ რეჟიმში შემოგთავაზებთ აშშ-ს 45-ე პრეზიდენტის ინაუგურაციას.