როგორც TV პირველის ეთერში გახდა ცნობილი, ხვალიდან ოპოზიციის ლიდერები ფასილიტატორებს ინდივიდუალურად შეხვდებიან.

პარტია მოქალაქეების ლიდერის, ალეკო ელისაშვილის განცხადებით, ფასილიტატორებს კრიზისის განმუხტვა სურთ და ოპოზიციაც ამ აზრზეა.

"ჩვენც გვინდა, რომ კრიზისი განიმუხტოს. ერთადერთი ვინც არის გაჯიქებული და გაჯიუტებული არის ხალხი, ვინც არჩევნები გააყალბა", — განაცხადა ელისაშვილმა.

არჩევნებთან დაკავშირებით პოლიტიკური პარტიების ლიდერები აშშ-სა და ევროკავშირის ელჩებს რამდენჯერმე შეხვდნენ. შეხვედრას ოპოზიციურ პარტიებთან ერთად ქართული ოცნებიდან, პარლამენტის თავმჯდომარე, არჩილ თალაკვაძეც ესწრებოდა. შეხვედრის დეტალებზე პოლიტიკოსები არ საუბრობენ, თუმცა აღნიშნავენ, რომ მხარეების პოზიციები უცვლელია.

ოპოზიცია 31 ოქტომბერს ჩატარებული არჩევნების შედეგებს არ აღიარებს. მათ საპარლამენტო მანდატებზე უარი უკვე თქვეს. ახალი არჩევნების მოთხოვნით, ოპოზიციის წარმომადგენლები საპროტესტო აქციებს მართავენ. მომდევნო აქცია რუსთაველის გამზირზე 21 ნოემბერსაა დაგეგმილი.