თემქაზე მომხდარი მკვლელობის საქმეზე განზრახ მკვლელობის მუხლით ბრალდებულს აღკვეთის ღონისძიების სახით პატიმრობა შეეფარდა. გარდა ამისა, დანაშაულის შეუტყობინებლობის ბრალდებით დაკავებული მეორე პირიც პატიმრობაში რჩება.

14 ნოემბერს შინაგან საქმეთა სამინისტრომ გაავრცელა ინფორმაცია, რომ თბილისში დააკავეს პირი, რომელმაც ერთი ადამიანი მოკლა და ერთი დაჭრა, ხოლო კვალის დაფარვის მიზნით, საცხოვრებელ სახლში ხანძარი გააჩინა.

გამოძიების ინფორმაციით, ბრალდებული მეგობარ გოგოსთან და კიდევ ერთ ნაცნობთან ერთად ერთ-ერთი პირის სახლში სტუმრად იმყოფებოდა. შსს-ს ცნობით, დაკავებულსა და მის ნაცნობს შორის ურთიერთშელაპარაკება ჩხუბში გადაიზარდა, რა დროსაც ბრალდებულმა მასპინძელსა და თავის ნაცნობ კაცს ჭრილობები მიაყენა.

როგორც უწყებაში აღნიშნავენ, სახლის პატრონმა გაქცევა მოასწრო და ის საავადმყოფოში გადაიყვანეს, ხოლო მეორე პირი ადგილზე გარდაიცვალა. გამოძიების მტკიცებით, ბრალდებულმა, კვალის დაფარვის მიზნით, შემთხვევის ადგილზე ხანძარი გააჩინა და თანმხლებ ქალთან ერთად მიიმალა. სამართალდამცველებმა, შემთხვევის ადგილის დათვალიერების შედეგად, დანაშაულის ჩადენის იარაღი — დანა ნივთმტკიცებად ამოიღეს.

შინაგან საქმეთა სამინისტროში ამბობენ, რომ ბრალდებულის მეგობარმა ქალმა პოლიციას დანაშაულის შესახებ არ შეატყობინა, რის გამოც პოლიციამ იგი განსაკუთრებით მძიმე დანაშაულის შეუტყობინებლობის ბრალდებით დააკავა. დანაშაული 3-დან 7 წლამდე ვადით თავისუფლების აღკვეთას ითვალისწინებს.

გამოძიება განზრახ მკვლელობის, ასევე, ორი ან მეტი პირის მიმართ დამამძიმებელ გარემოებაში ჩადენილ განზრახ მკვლელობის მცდელობის, სხვისი ნივთის დაზიანების ან განადგურებისა და განსაკუთრებით მძიმე დანაშაულის შეუტყობინებლობის საქმეზე სისხლის სამართლის კოდექსის 108-ე, 19-109-ე მუხლის მე-3 ნაწილის "ა" ქვეპუნქტით, 187-ე მუხლის მე-2 ნაწილის "ა" ქვეპუნქტით და 376-ე მუხლის მე-2 ნაწილით მიმდინარეობს. დანაშაული 16-დან 20 წლამდე ვადით ან უვადო თავისუფლების აღკვეთას
ითვალისწინებს.