ნაციონალური მოძრაობის ერთ-ერთი წევრის, სალომე სამადაშვილის თქმით, ოპოზიციის ლიდერებისა და ამერიკის ელჩის, კელი დეგნანის შეხვედრა სტრატეგიული მოკავშირეების ინიციატივით იმართება.

"ეს არის ჩვენის სტრატეგიული მოკავშირეების ინიციატივით გამართული შეხვედრა. მოლოდინი გვქონდა, რომ ჩვენი სტრატეგიული მოკავშირეები ძალიან აქტიურად ჩაებმებოდნენ მოლაპარაკებების პროცესში. ძალიან სამწუხაროა, რომ ჩვენ არ შეგვიძლია მესამე არბიტრის გარეშე ვესაუბროთ ერთმანეთს სხვადასხვა პოლიტიკურმა ძალებმა, თუნდაც მწვავედ დაპირისპირებულმა ჯგუფებმა", — განაცხადა სამადაშვილმა რუსთავი 2-ის ეთერში.

მისივე ინფორმაციით, შეხვედრა ევროკავშირისა და ამერიკის შეერთებული შტატების მისიების ლიდერობით იმართება.

ამ წუთებში პოლიტიკური პარტიის ლიდერები აშშ-ს ელჩს, კელი დეგნანს ხვდებიან. გავრცელებული ინფორმაციით, შეხვედრას ოპოზიციურ პარტიებთან ერთად ქართული ოცნებიდან, პარლამენტის თავმჯდომარე, არჩილ თალაკვაძეც ესწრება.

ოპოზიცია 31 ოქტომბერს ჩატარებული არჩევნების შედეგებს არ აღიარებს. მათ საპარლამენტო მანდატებზე უარი უკვე თქვეს. რიგგარეშე არჩევნების მოთხოვნით, ოპოზიციის წარმომადგენლები საპროტესტო აქციებს მართავენ. მომდევნო აქცია რუსთაველის გამზირზე ზეგ, 14 ნოემბერსაა დაგეგმილი.