პოლიტიკური პარტიის ლიდერები აშშ-ს ელჩს, კელი დეგნანს ხვდებიან. ინფორმაცია ამის შესახებ On.ge-ს ერთ-ერთ ოპოზიციურ პარტიაში დაუდასტურეს.

გავრცელებული ინფორმაციით, შეხვედრას ოპოზიციურ პარტიებთან ერთად ქართული ოცნებიდან, პარლამენტის თავმჯდომარე, არჩილ თალაკვაძეც ესწრება. როგორც ტელეკომპანიების მიერ გავრცელებულ კადრებში ჩანს, შეხვედრაზე არჩევნებში ბარიერგადალახული პარტიის ლიდერები არიან მისული, მათ შორის გირჩის, ევროპული საქართველოს, ლელოს, სტრატეგია აღმაშენებლის, პატრიოტთა ალიანსის, ნაციონალური მოძრაობის, ლეიბორისტული პარტიისა და მოქალაქეების ლიდერები.

პარტია მოქალაქეების ლიდერი, ალეკო ელისაშვილი ამბობს, რომ ისინი არსებულ პოლიტიკურ კრიზისზე ისაუბრებენ. ამასთან, ოპოზიციის ლიდერები არ ამბობენ, ვისი ინიციატივით შედგა შეხვედრა.

პატრიოტთა ალიანსის ლიდერი, ირმა ინაშვილი ამბობს, რომ ისინი მზად არიან დიალოგისთვის და ამაზე უარი არასდროს უთქვამთ. შეხვედრის დაწყების წინ, ლეიბორისტული პარტიის თავმჯდომარემ, შალვა ნათელაშვილმა განაცხადა, რომ დიალოგი შეიძლება იყოს ერთადერთ საკითხზე, რომ ხელახალი არჩევნები ჩატარდეს.

გუშინ, 11 ნოემბერს ნაციონალური მოძრაობის თავმჯდომარემ, გრიგოლ ვაშაძემ განაცხადა, რომ მმართველ გუნდთან ოპოზიციის "თითქმის მომზადებული" მოლაპარაკებები ჩაიშალა.