პრეზიდენტი გიორგი მარგველაშვილი გაზპრომთან შეთანხმების შესახებ მოუწოდებს პარლამენტს, რომ გააძლიეროს საზედამხედველო ფუნქცია და წარმოადგინოს გეგმა, თუ როგორ მოხდება მოსალოდნელი რისკებისა და საფრთხეების დაზღვევა.

პრეზიდენტის პრეს-სპიკერმა ეკა მიშველაძემ დღეს 17 იანვარს, გიორგი მარგველაშვილის პოზიცია წარმოადგინა. მისი განცხადებით, პრეზიდენტი მიიჩნევს, რომ გაზპრომთან ხელშეკრულებაზე ხელმოწერით გაუარესდა ქვეყნის ენერგოსექტორი, დაზიანდა საქართველოს პოლიტიკური და ეკონომიკური ინტერესები.

პრეზიდენტი აცხადებს, რომ მთავრობა ენერგოუსაფრთხოების საკითხებით ნაკლებად ინტერესდება. მისივე განცხადებით, საბოლოოდ, საქართველო დამატებითი პოლიტიკურ რისკებს მიიღებს ენერგოუსაფრთხოების თვალსაზრისით.

პრეს-სპიკერის თქმით, მარგველაშვილი 2016 წლის დასაწყისში საუბრობდა იმაზე, რომ გაზპრომთან მოლაპარაკებები გამჭვირვალედ უნდა მიმდინარეობდეს:

"გაზპრომი არ არის მხოლოდ ენერგეტიკა. არ უნდა დავივიწყოთ, რომ რუსეთი ეკონომიკურ ბერკეტებს პოლიტიკური მიზნით იყენებს. ამიტომ გაზპრომთან მოლაპარაკებები ქვეყნის უმაღლესი პოლიტიკური ხელმძღვანელობის მანდატით დადგენილი წითელი ხაზების ფარგლებში, გამჭვირვალედ უნდა მიმდინარეობდეს".

პრეზიდენტის აზრით, გაზპრომის თემა არის უფრო მეტია ვიდრე ბიზნესგარიგება, რომ ეს არის უსაფრთხოება, საგარეო პოლიტიკა, გეოპოლიტიკა და ამის შემდეგ უკვე ენერგეტიკა და ეკონომიკა.

პრეზიდენტის განცხადებით, გაზპრომთან ხელშეკრულების ხელმოწერით, ერთ-ერთ ყველაზე მნიშვნელოვან - ენერგოსექტორში, მდგომარეობა გაუარესდა.

მას პარლამენტის მიერ 2016 წლის 29 დეკემბერს, საქართველოს საგარეო პოლიტიკის შესახებ მიღებული რეზოლუციის მე-8 და მე-10 პუნქტები მოჰყავს მაგალითად სადაც წერია:

"საერთაშორისო მექანიზმების გამოყენებით, საქართველო გააგრძელებს რუსეთის ფედერაციასთან რაციონალურ და პრინციპულ პოლიტიკას..."

"საქართველოს საგარეო პოლიტიკის პრიორიტეტია ტრანსნაციონალური პროექტებისთვის ხელსაყრელი გეოპოლიტიკური მდებარეობის ქმედითი გამოყენება და აღმოსავლეთის ქვეყნებთან ეკონომიკური და სხვა ურთიერთობების გაფართოება."

საქართველოს პრეზიდენტის აზრით, გაზპრომთან მიმართებაში ეს მიზნები ვერ იქნა მიღწეული.