მოძრაობა სირცხვილიამ 22:00-დან 05:00 საათამდე, გადაადგილების შეზღუდვის პარალელურად პარლამენტთან აქცია დაანონსა. მათი თქმით, დღეს ამ შეზღუდვებს "დაუმორჩილებლობას" გამოუცხადებენ.

საკოორდინაციო საბჭოს გადაწყვეტილებით, დღეიდან, 9 ნოემბრიდან დიდ ქალაქებში: თბილისში, ბათუმში, ქუთაისში, რუსთავში, ზუგდიდში, გორსა და ფოთში 22 საათიდან დილის 5 საათამდე გადაადგილება შეიზღუდება. შეზღუდვა გავრცელდება როგორც ქვეითად, ისე ტრანსპორტით და კერძო ავტომობილებით მოსიარულეებზე.

ინფრასტრუქტურის მინისტრ მაია ცქიტიშვილის განცხადებით, შეზღუდვა არ გავრცელდება საერთაშორისო საავტომობილო გადაზიდვებზე და საოპერაციო შტაბთან შეთანხმებით, იმ პირებსა და საავტომობილო საშუალებებზე, რომლებიც სტრატეგიული ობიექტების ფუნქციონირებისთვის გადაადგილდებიან. მისივე თქმით, დღის საათებში ტრანსპორტის გადაადგილება შეზღუდული არ იქნება. ცქიტიშვილმა ასევე აღნიშნა, რომ ეს არ არის კომენდანტის საათი. რაც შეეხება სანქციას, მისი თქმით, ჯარიმა 2 000 ლარი იქნება, თუმცა მოგვანებით ინფორმაცია დეტალურად გავრცელდება.