ალბათ, უკვე იცით, რომ აშშ-ის ამჟამინდელი პრეზიდენტი, დონალდ ტრამპი არჩევნებში დამარცხდა და მას მეორე ვადით ხელისუფლების მეთაურად აღარ აირჩევენ: აშშ-ის 46-ე პრეზიდენტი ჯო ბაიდენი, პირველი ქალი ვიცეპრეზიდენტი კი კამალა ჰარისი გახდება.

კინომოყვარულებმა ასევე კარგად იციან, რომ გასულ თვეში საშა ბარონ კოენის საკულტო კომედია ბორატის მომდევნო ფილმი გამოვიდა, რომელმაც წინასაარჩევნოდ ტრამპის ადმინისტრაცია სკანდალში გახვია: სხვა მრავალ თავზეხელაღებულ სცენასთან ერთად ფილმის ფინალში ტრამპთან დაახლოებული პირის — რუდი ჯულიანის ინტიმური კადრები გამოჩნდა.

ამის გამო, ცხადია, საშა ბარონ კოენი დონალდ ტრამპის სიმპათიას ვერ იმსახურებს: რამდენიმე დღის წინ პრეზიდენტმა მას "შექანებული" უწოდა.

"წლების წინ მან ჩემთვის ოინის მოწყობა სცადა, თუმცა ერთადერთი ვიყავი, ვისთანაც ეს არ გამოუვიდა. ცრუპენტელაა და სასაცილო სულაც არ მგონია. ჩემთვის ის შექანებული ვინმეა", — თქვა დონალდ ტრამპმა მსახიობ საშა ბარონ კოენზე, რომელიც გამოგონილ ყაზახ ჟურნალისტს, ბორატ საგდიევს განასახიერებს.

ამ განცხადების გამო კოენმა ტრამპს მადლობა გადაუხადა და სულგრძელი წინადადებაც შესთავაზა:

"დონალდ, ვაფასებ, რომ ბორატს უფასო რეკლამა გაუკეთე. ვაღიარებ, რომ არც შენ მგონიხარ სასაცილო, თუმცა მაინც მთელი მსოფლიო დაგცინის. ყოველთვის ვეძებ ვინმეს, ვინც რასისტ მასხარას განასახიერებს, შენ კიდევ 20 იანვრის შემდეგ სამსახური დაგჭირდება. დავილაპარაკოთ ამაზე", — ასე გამოეხმაურა საშა ბარონ კოენი ტრამპის განცხადებას.

რა თქმა უნდა, არჩევნების შედეგების გამოცხადების შემდეგ საშა ბარონ კოენმა კიდევ ერთხელ გამოიყენა შესაძლებლობა, რომ აშშ-ის პრეზიდენტისთვის მიემართა და ამჯერად თავისი "შეთავაზება" სამუშაოსთან დაკავშირებით უკან წაიღო:

"დონალდ, უმუშევარი დარჩი და ვიცი, რომ სამსახური შემოგთავაზე, მაგრამ გასულ კვირას შენი ქმედებები მეტისმეტად ტრაგიკული და სევდიანი იყო. შეთავაზება გაუქმებულია", — წერს კოენი ტვიტერის პირად ანგარიშზე.

ტრამპის "ქმედებებში" მსახიობი ალბათ იმ განცხადებებს გულისხმობს, რომლითაც ამერიკის 45-ე პრეზიდენტმა არჩევნები გაყალბებულად, საკუთარი თავი კი გამარჯვებულად გამოაცხადა.

საშა ბარონ კოენი ერთადერთი არ იყო, ვინც მას ამის გამო ირონიულად გამოეხმაურა:

სამეფო კარის თამაშებში ღამის მეფის როლის შემსრულებელმა, ვლადიმირ ფურდინიკმა დაწერა, რომ ტრამპმა საპრეზიდენტო არჩევნები ისევე მოიგო, როგორც ღამის მეფემ ვინტერფელის ბრძოლა.