აჭარის ტელევიზია უმაღლეს საბჭოს მეურვის ვაკანტურ თანამდებობაზე კონკურსის გამოცხადებას სთხოვს.

საზოგადოებრივი მაუწყებლის აჭარის ტელევიზიისა და რადიოს დირექტორი, ნათია კაპანაძე აჭარის ავტონომიური რესპუბლიკის უმაღლეს საბჭოს თავმჯდომარეს, დავით გაბაიძეს მიმართავს, მაუწყებლის მრჩეველთა საბჭოს წევრის ვაკანტურ ადგილზე კონკურსი გამოაცხადოს. მიმართვა კაპანაძემ გაბაიძეს 13 იანვარს გაუგზავნა.

კაპანაძე მიიჩნევს, რომ მრჩეველთა საბჭო არასრული შემადგენლობით ფუნქციონირება მაუწყებლის პროგრამული პრიორიტეტებისა და ფინანსების ეფექტური მართვის კუთხით, შესაძლოა, გაურკვევლობის წარმოშობის საფუძველი გახდეს. გარდა ამისა, მაუწყებლის დირექტორი აღნიშნავს, რომ ორგანიზაციას არ აქვს მოკლევადიანი და გრძელვადიანი სტრატეგიული დოკუმენტი, გასამართია მართვის სტრუქტურა, თანამშრომლების შრომის უსაფრთხოებისა და ორგანიზაციის ფუნქციონირებისთვის საჭირო მატერიალურ-ტექნიკური საკითხები.

„გთხოვთ, სსიპ საზოგადოებრივი მაუწყებლის აჭარის ტელევიზიისა და რადიოს დამოუკიდებლობისა და სტაბილური განვითარების უზრუნველყოფის მიზნით, თქვენი ყურადღების ობიექტი გახდეს სსიპ საზოგადოებრივი მაუწყებლის აჭარის ტელევიზიისა და რადიოს მრჩეველთა საბჭოს სრული დაკომპლექტების პროცესი. შესაბამისად, მოგვცეთ შესაძლებლობა მმართველი რგოლების სრული შემადგენლობით ამუშავებით და სინერგიით ჩვენი მაუწყებელი გახდეს ანგარიშვალდებულების საუკეთესო მაგალითი ქვეყანაში,” - წერს კაპანაძე გაბაიძიეს.

საზოგადოებრივი მაუწყებლის აჭარის ტელევიზიისა და რადიოს მრჩეველთა საბჭოს წევრის თანამდებობა 2016 წლის 19 აგვისტოს შემდეგ ვაკანტურია. ამ დროიდან დატოვა თანამდებობა 5-წევრიანი მრჩეველთა საბჭოს წევრმა ზაზა ხალვაშმა. ის საბჭოში უმრავლესობის მიერ იყო წარდგენილი. შესაბამისად, მის ნაცვლად კანდიდატის დასახელების უფლება კვლავ უმრავლესობას ექნება. საბჭოს წევრი 6-წლიანი ვადით ირჩევა. თუმცა, პირი, რომელიც ხალვაშს ჩაანაცვლებს მისი დარჩენილი ვადით, დაახლოებით 3 წლით შეასრულებს საქმიანობას.

მხოლოდ აჭარის ტელევიზია და რადიო არაა, სადაც მეურვეები სრულად არ არიან არჩეულები. მსგავსი შემთხვევაა საზოგადოებრივ მაუწყებელში. 9-წევრიანი სამეურვეო საბჭო 8 წევრით არის დაკომპლექტებული. ამ შემთხვევაშიც, ვაკანტურია უმრავლესობის მიერ დასასახელებელი მეურვის კვოტა. მეურვის თანამდებობა მას შემდეგ გახდა ვაკანტური, რაც ნათელა სახოკიამ, შვილის - ირაკლი რუხაძის ტელეკომპანია იმედის სამეთვალყურეო საბჭოს თავმჯდომარედ დანიშვნის გამო, 13 ივნისს დატოვა.

მაუწყებლობის შესახებ კანონით, მეურვის უფლებამოსილების შეწყვეტიდან 10 კალენდარული დღის განმავლობაში საქართველოს პარლამენტის თავმჯდომარე გამოსცემს ბრძანებას კონკურსის გამოცხადების შესახებ, რომლითაც განსაზღვრავს მეურვეობის კანდიდატთა მიერ განაცხადების წარდგენის ვადას არაუმეტეს 15 კალენდარული დღისა. თუმცა, აჭარის ტელევიზიისა და რადიოს შემთხვევაში, საქართველოს კანონმდებლობაში მსგავსი ნორმა არ დევს.