"სიამაყით ვულოცავ ჩვენს მომავალ პრეზიდენტს, ჯო ბაიდენს და მომავალ პირველ ლედის, ჯილ ბაიდენს. ასევე, ვულოცავ კამალა ჰარისსა და დაგ ემოფს (კამალას ქმარს) მომავალ ვიცე-პრეზიდენტად არჩევას", — ასე გამოეხმაურა აშშ-ის ყოფილი პრეზიდენტი ბარაკ ობამა არჩევნების პირველად შედეგებს.

"ამ არჩევნებში, ამერიკამ აჩვენა ისეთი რიცხვები, როგორიც ისტორიას არ ახსოვს. და როცა ყველა ხმა დათვლილი იქნება, პრეზიდენტად არჩეული ბაიდენი და ვიცე-პრეზიდენტად არჩეული ჰარისი ისტორიულ და საბოლოო გამარჯვებას გვიჩვენებენ.

იღბლიანები ვართ, რომ ჯომ ყველაფერი გააკეთა პრეზიდენტობისთვის და უკვე ამ გზაზე დგას. რადგან იანვარში, როდესაც ის თეთრ სახლში შევა, მას უამრავი გამოწვევა დახვდება. ისეთი, როგორიც არცერთ პრეზიდენტს აქამდე — მძვინვარე პანდემია, უთანასწორო ეკონომიკა და სასამართლო სისტემა, რისკის ქვეშ არსებული დემოკრატია და კლიმატის ცვლილებების საფრთხე.

ვიცი, რომ ის ყველა ამერიკელის საუკეთესო ინტერესს გაითვალისწინებს საკუთარი მოვალეობის შესრულების დროს", — წერს ბარაკ ობამა და ბაიდენთან ერთად გადაღებულ ფოტოს აქვეყნებს.

ობამას თქმით, დარწმუნებულია, რომ ბაიდენი ყველა ამერიკელის საუკეთესო ინტერესს გაითვალისწინებს საკუთარი მოვალეობის შესრულების დროს, იმის მიუხედავად, მიიღო თუ არა მათი ხმები. ის მოუწოდებს ყველა ამერიკელს, რომ მისცენ ბაიდენს შანსი და გამოუცხადონ მხარდაჭერა.

"ეს არჩევნები გვიჩვენებს, რომ ქვეყანა სამწუხაროდ გაყოფილია. არამხოლოდ ჯოსა და კამალას, ასევე, ყველა ჩვენგანს გვევალება, რომ ჩვენი საქმე გავაკეთოთ, გამოვიდეთ კომფორტის ზონიდან, მოვუსმინოთ სხვებს, დავუწიოთ ტემპერატურას (ბრაზის შემცირებას გულისხმობს აქ) და ვიპოვოთ საერთო წერტილი წინ წასასვლელად. უნდა გვახსოვდეს, რომ ჩვენ ერთი ერი ვართ", — წერს ის.

ექსპრეზიდენტმა მადლობა გადაუხადა ყველა ამერიკელს, ვინც პირველად მისცა ხმა და საარჩევნო პროცესში ჩაერთო. ასევე, მათ, ვინც ბაიდენის კამპანიაში იყვნენ ჩართული/

"თქვენმა მონდომებამ ცვლილებები მოიტანა. ისიამოვნეთ ამ მომენტით, შემდეგ კი განაგრძეთ ბრძოლა. ვიცი, რომ ეს ხანდახან დამღლელი ჩანს, მაგრამ დემოკრატია აქტიურ მოქალაქეობას და პრობლემებზე ყურადღების გამახვილებას მოითხოვს. არამხოლოდ წინასაარჩევნოდ, მაგრამ ასევე არჩევნებს შორისაც.

ჩვენს დემოკრატიას ახლა ყველაზე მეტად ვჭირდებით და მე და მიშელი მხარდაჭერას ვუცხადებთ ჩვენს ახალ პრეზიდენტსა და პირველ ლედის", — განაცხადა მან.

შეგახსენებთ, რომ ჯო ბაიდენმა 2008 წელს ბარაკ ობამასთან ერთად საპრეზიდენტო არჩევნებში გაიმარჯვა და შემდეგი რვა წელი აშშ-ს ვიცე-პრეზიდენტი იყო.

წინასწარი მონაცემებით, ჯო ბაიდენი აშშ-ის 46-ე პრეზიდენტი გახდა. ინფორმაცია ამის შესახებ CNN-მა, BBC-მ და სხვა საერთაშორიო მედიებმა თავიანთ მონაცემებზე დაყრდნობით გაავრცელეს.

CNN-ის ინფორმაციით, მას შემდეგ, რა ბაიდენმა გაიგო, რომ წინასწარი მონაცემებით აშშ-ის საპრეზიდენტო არჩევნებში გაიმარჯვა, ჩაინიშნა ბრიფინგი, რომელზეც ის მოსახლეობას მიმართავს.

დონალდ ტრამპი გახდა პირველი პრეზიდენტი 1992 წლის შემდეგ, რომელიც ამერიკელმა ხალხმა ხელმეორედ აღარ აირჩია.

გაიგეთ მეტი ჯო ბაიდენზე: