ცენტრალური საარჩევნო კომისიის ოფისთან ისევ საპროტესტო აქცია გაიმართა. ოპოზიციური პარტიების ახალგაზრდული ფრთის წარმომადგენლებმა ცესკოსთან აღმართულ რკინის ჯებირს გრინჩის ფიგურები მიაკრეს. მათი თქმით, როგორც გრინჩმა მოიპარა შობა, ისე თამარ ჟვანიამ მოიპარა არჩევნები.

გარდა ამისა, რკინის ჯებირზე გაკრულია საპროტესტო ფოტომონტაჟები, რომლებზეც გრინჩს თამარ ჟვანიას სახე აქვს.

უკვე მეშვიდე დღეა ოპოზიცია არჩევნების შედეგებს აპროტესტებს და ცესკოს გაყალბებაში ადანაშაულებს. ისინი არჩევნებს არალეგიტიმურად ცნობენ, მეორე ტურში მონაწილეობაზე უარს ამბობენ და ვადამდელის დანიშვნას მოითხოვენ.

ხვალ, 8 ნოემბერს რუსთაველის გამზირზე ოპოზიციურ პარტიებს საპროტესტო აქცია აქვს დაგეგმილი. აქციას უერთდება ყველა ბარიერგადალახული ოპოზიციური პარტია პატრიოტთა ალიანსის გარდა.