საქართველოში აშშ-ის საელჩოსა და ევროკავშირის წარმომადგენლობა საქართველოს ყველა მოქალაქეს, ვინც 8 ნოემბერს შეკრების უფლების გამოყენებას აპირებს, მოუწოდებს ეს მშვიდობიანად და Covid-19-თან დაკავშირებული უსაფრთხოების ზომების დაცვით განახორციელონ. ისინი, ასევე, მოუწოდებენ საქართველოს ხელისუფლებას სათანადო გარემოს შექმნას ხელი შუეწყოს.

"რაც შეეხება მიმდინარე საარჩევნო პროცესს, მოვუწოდებთ პოლიტიკურ პარტიებს, განაგრძონ საარჩევნო დარღვევებთან დაკავშირებული მტკიცებულებების განხილვა სამართლებრივი საშუალებების გამოყენებით, იმ დემოკრატიული პროცესების ფარგლებში, რომელიც საქართველომ ბოლო 20 წლის განმავლობაში შექმნა", — წერია აშშ-ის საელჩოსა და ევროკავშირის წარმომადგენლობის ერთობლივ განცხადებაში.

მათივე თქმით, დასაბუთებული საარჩევნო დარღვევების გამოსასწორებლად აუცილებელია სანდო და ინკლუზიური სამართლებრივი პროცესი, რათა მოხდეს ამომრჩეველთა ნების პატივისცემა, საარჩევნო პროცესისადმი საზოგადოების ნდობის განმტკიცება, რათა საზოგადოებამ არჩევნების შედეგების ლეგიტიმურად ცნობა შეძლოს. ისინი ამ მიზნების მისაღწევად, საჭიროებისამებრ, წვლილის შეტანისთვის მზაობას გამოთქვამენ.

განცხადებაში, აგრეთვე, აღნიშნულია, რომ საქართველოს სჭირდება პარლამენტი, რომელიც გადაუდებელი პრობლემების გადაჭრაში თავისი როლის შესრულებას შეძლებს, როგორიცაა ეკონომიკური არასტაბილურობა, პანდემია და რეგიონული დაძაბულობა; ამასთანავე, გაატარებს დამატებით რეფორმებს ქვეყნის სამომავლო დემოკრატიული, სამართლებრივი და საარჩევნო პროცესების გასაუმჯობესებლად. დიპლომატიური კორპუსის წარმომადგენლები ყველა პოლიტიკურ მხარეს ასეთი შედეგის უზრუნველსაყოფად პასუხისმგებლობის დაუყოვნებლივ აღებისკენ მოუწოდებენ.