საზოგადოებრივი მაუწყებლის თანამშრომელთა ნაწილმა, რომელთა შორის არიან მოამბის ჟურნალისტები, მემონტაჟეები და ტექნიკური პერსონალი, დღეს, 18 მაისს, მაუწყებლის წინ გამაფრთხილებელი აქცია გამართა. ისინი მაუწყებლისგან სამუშაო პირობების გაუმჯობესებასა და ხელფასების მომატებას ითხოვენ.

მოამბის ჟურნალისტის, ლაშა მესხის თქმით, თუ მათი მოთხოვნები არ დაკმაყოფილდება, ისინი 21 დღეში გაიფიცებიან.

საზოგადოებრივი მაუწყებლის თანამშრომლები მიმართავენ შრომის, ჯანმრთელობისა და სოციალური დაცვის მინისტრს, გამოყოს მედიატორი მათსა და მაუწყებლის ხელმძღვანელობას შორის მოლაპარაკების საწარმოებლად, რათა არ შეფერხდეს მაუწყებლობა.

On.ge ცდილობს დაუკავშირდეს პირველი არხის მენეჯმენტსა და პრესსამსახურს, გაიგოს, რას პასუხობს მაუწყებელი თანამშრომელთა პროტესტს, თუმცა, ჯერჯერობით, მათთან დაკავშირება ვერ ხერხდება.