სიღნაღის მუნიციპალიტეტში ერთი პირი 7 კილომდე ჰეროინის შეძენა-შენახვის ბრალდებით დააკავეს. ინფორმაცია ამის შესახებ შინაგან საქმეთა სამინისტრომ გაავრცელა.

შსს-ს ინფორმაციით, ნარკოტიკული ნივთიერება, რომლის ზუსტი ოდენობა 6 კილო და 500 გრამია, სიღნაღში, სოფელ ვაქირში პირის ავტომანქანის ჩხრეკისას ამოიღეს.

შინაგან საქმეთა სამინისტროს ცნობით, საქმეზე გამოძიება საქართველოს სისხლის სამართლის კოდექსის 260-ე მუხლის მე-6 ნაწილით დაიწყო, რაც განსაკუთრებით დიდი ოდენობით ნარკოტიკული საშუალების, მისი ანალოგის, პრეკურსორის ან ახალი ფსიქოაქტიური ნივთიერების უკანონო დამზადება, წარმოება, შეძენა, შენახვა, გადაზიდვა, გადაგზავნა ან გასაღებას გულისხმობს.