ევროპული საქართველოს ერთ-ერთი ლიდერი, სერგი კაპანაძე საოლქო საარჩევნო კომისიის წევრებს მიმართავს და მოუწოდებს, "არ ჩაყვნენ პოლიტიკურ საფლავში" ქართულ ოცნებას და ცენტრალური საარჩევნო კომისიის თავმჯდომარეს, თამარ ჟვანიას.

"მინდა მივმართო როგორც საოლქო კომისიებს, ისე მათ წევრებს და თავმჯდომარეებს, [...] ნუ ჩაყვებიან პოლიტიკურ საფლავში ნურც ჟვანიას და ნურც ქართულ ოცნებას", — ამბობს სერგი კაპანაძე.

ეს განცხადება მან დღეს გამართულ ბრიფინგზე გააკეთა, სადაც ისაუბრა სამგორის 97-ე უბნის ხმების დათვლისას დაფიქსირებულ შესაძლო დარღვევებზე. კაპანაძის თქმით, ამ უბანზე ბიულეტენები, რომლებშიც ოპოზიციური პარტიების საარჩევნო ნომერი იყო შემოხაზული, გამოუყენებელი ბიულეტენების დასტაში აღმოჩნდა.

"სამგორის 97-ე უბნის გახსნის და ბიულეტენების გადათვლის შედეგად, ბიულეტენები, სადაც ოპოზიციური ხმები იყო აღრიცხული, აღმოჩნდა გამოუყენებელი ხმების დასტაში. ეს არის უპრეცედენტო დარღვევა, რადგან გამოუყენებელი ბიულეტენების დასტა ილუქება მანამ, სანამ საერთოდ მოხდება ყუთის გახსნა", — განაცხადა კაპანაძემ.

სერგი კაპანაძე ამბობს, რომ მსგავსი შეცდომების გამოაშკარავების შიშით, კომისიის წევრები ხმების გადათვლაზე უარს ამბობენ.

"მიიღეს გადაწყვეტილება და უკვე დაავალეს სხვადასხვა საოლქოებს, რომ აღარ გახსნან და აღარ გადათვალონ უბნები და ეს არის ძალიან შემაშფოთებელი რამ, რადგან პრაქტიკულად ამით წერტილი დაუსვეს შანსს იმისა, რომ ეს უბნები იყოს გაუქმებული", — ამბობს კაპანაძე.

31 ოქტომბრის არჩევნების ცესკოს გამოცხადებულ შედეგებს ოპოზიცია არ აღიარებს. პარტიების ლიდერები ტოტალურ გაყალბებაზე საუბრობენ და პროტესტის ნიშნად, უარს აცხადებენ მოპოვებულ საპარლამენტო მანდატებზე.

გაიგეთ მეტი: