გირჩის ერთ-ერთი ლიდერის, იაგო ხვიჩიას თქმით, ერთიანი ნაციონალური მოძრაობის წევრებმა უნდა დაამტკოცონ, რომ საშიში არ იქნებიან ადამიანებისთვის. ამის შესახებ მან TV პირველის ეთერში ისაუბრა.

"ადამიანებს უნდა უთხრა, როგორი საქართველო გინდა ბიძინა ივანიშვნილის შემდეგ, ხელი მოვაწერეთ შეთანხმებას ოპოზიციამ, მაგრამ მერე დავიკარგეთ ჩვენს საარჩევნო კამპანიებში. [...] ხალხი უნდა მოვიყვანოთ სიყალბის რეალური ფაქტების ჩვენებით, მეორე, როგორი საქართველო უნდა ოპოზიციას და მესამე, ეს არის შიშის მოხსნა. ამ ადამიანებს, ვინც აქციაზე მოდის, აშინებენ ნაცებით, აშინებენ მიხეილ სააკაშვილით, აშინებენ იმით, რომ ვიღაც მოვა ცოცხებით და ა.შ. ჩემი აზრით, ეს შიში უნდა მოიხსნას. ნაციონალურმა მოძრაობამ რამე უნდა გააკეთოს. ნაციონალებმა უნდა დააჯეროს ხალხს, რომ საშიში არ იქნებიან მათთვის", — განაცხადა ხვიჩიამ.

საპარლამენტო არჩევნები საქართველოში 31 ოქტომბერს ჩატარდა. პარლამენტის არჩევნები წელს პირველად პროპორციულთან მიახლოებული, 120/30-ზე სისტემით გაიმართა. ცესკოს გამოცხადებულ შედეგებს ოპოზიცია არ აღიარებს და პერმანენტულად აქციებს გეგმავს. პარტიების ნაწილი ამბობს, რომ სადეპუტატო მანდატებზე უარს იტყვიან, რათა რიგგარეშე არჩევნები ჩატარდეს.

ახალი საარჩევნო სისტემით, პარლამენტში პროპორციული სიისთვის 120 მანდატია გათვალისწინებული. ცესკოს ახლანდელი მონაცემებით, ეს მანდატები პარტიების მოპოვებული ხმების მიხედვით ასე უნდა გადანაწილებულიყო:

  • ქართული ოცნება — 48,15% — 61 მანდატი;
  • ნაციონალური მოძრაობა და ძალა ერთობაშია — 27,14% — 35 მანდატი;
  • ევროპული საქართველო — 3,78% — 5 მანდატი;
  • ლელო — 3,15% — 4 მანდატი;
  • სტრატეგია აღმაშენებელი — 3,15% — 4 მანდატი;
  • პატრიოტთა ალიანსი — 3,15% — 4 მანდატი;
  • გირჩი — 2, 89% — 4 მანდატი;
  • მოქალაქეები — 1,33% — 2 მანდატი;
  • ლეიბორისტული პარტია — 1% — 1 მანდატი.