საქართველოს პრეზიდენტმა, გიორგი მარგველაშვილმა, ონლაინ-სესხების, მიკროსაფინანსოებისა და ბანკების ახალ რეგულაციებთან დაკავშირებულ საკანონმდებლო პაკეტს ხელი მოაწერა. თუმცა, პრეზიდენტს აქვს შენიშვნები, რომელიც საქართველოს ეროვნულ ბანკთან შეთანხმებით იქნება გათვალისწინებული.

„ჩამოგვიყალიბდა გარკვეული შენიშვნები: ამ რეგულაციების პირობებში დასაშვებია, რომ ფინანსურმა ინსტიტუტებმა გარკვეული პროდუქტები გააუქმონ, რაც ნეგატიურად აისახება საფინანსო სექტორზე. ამასთანავე, დასაშვებია, რომ საპროცენტო განაკვეთმა ლარში გაცემულ სესხებზე მომავალში აიწიოს,“ - აღნიშნა პრეზიდენტის მრჩეველმა მაია მიქელაძემ.

კონკრეტულად რა ცვლილებები შედის:

  • გასაყიდი პროდუქტის ღირებულება ლარში უნდა იყოს მითითებული.
  • იპოთეკით უზრუნველყოფილი სესხის ხელშეკრულებაში უნდა მიეთითოს ყოველთვიური საპროცენტო განაკვეთი. პროცენტის განსაზღვრის შემთხვევაში, გაცემული სესხის წლიური ეფექტური საპროცენტო განაკვეთი არ უნდა აღემატებოდეს 100%–ს, მათ შორის, სესხის ვადის გაგრძელების შემთხვევაში.
  • ყველა საკომისიოს, ნებისმიერი ფინანსური ხარჯის, ასევე სესხის გაცემის ხელშეკრულების ნებისმიერი პირობის დარღვევისათვის მსესხებლისათვის თითოეულ დღეზე დაკისრებული პირგასამტეხლოს ან ნებისმიერი ფორმის ფინანსური სანქციის ოდენობა ჯამურად არ უნდა აღემატებოდეს ხელშეკრულებით გაცემული სესხის ნარჩენი ძირი თანხის წლიურ 150%-ს.
  • ფიზიკურ პირზე სესხის სახით 100 ათას ლარამდე თანხა შეიძლება გაიცეს მხოლოდ ლარით.
  • სესხის გამცემს ეკრძალება მომხმარებელს დააკისროს მის მიერ გაცემულ სესხებზე წინსწრებით დაფარვის საკომისიო და/ან პირგასამტეხლო, ან ნებისმიერი სახის საჯარიმო სანქცია, რომელიც აღემატება სესხის ნარჩენი ძირითადი თანხის 2%-ს.
  • 20-ზე მეტი ფიზიკური პირისგან ფულადი სახსრების მოზიდვის შემთხვევაში თითოეული პირისგან მოზიდული თანხა არ უნდა იყოს 100 ათასი ლარზე ნაკლები. ეს რეგუალცია არ ვრცელდება კომერციულ ბანკებზე, საკრედიტო კავშირებზე, საბროკერო კომპანიებზე და ფასიანი ქაღალდების საჯარო შეთავაზებაზე. გარდა ამისა, ეროვნული ბანკის სამართლებრივი აქტით განსაზღვრულ საფინანსო სექტორის სხვა წარმომადგენლობაზე.