საქართველოსთვის სავიზო ლიბერალიზაციაზე ევროპარლამენტის საბოლოო კენჭისყრა 2 თებერვალს გაიმართება. ამის შესახებ საზოგადოებრივი მაუწყებლის კორესპონდენტი ბრიუსელში ქეთევან ქარდავა წერს ფეისბუქზე. მისი თქმით, თავდაპირველად, 13-16 თებერვალი სახელდებოდა კენჭისყრის დღედ, თუმცა საბოლოოდ თვის დასაწყისზე შეთანხმდნენ.

დღესვე, ევროპარლამენტის სამოქალაქო თავისუფლების, მართლმსაჯულებისა და საშინაო საკითხების კომიტეტმა (LIBE) საქართველოსთვის სავიზო ლიბერალიზაციის მინიჭებას მხარი დაუჭირა 42 ხმით 2-ის წინააღმდეგ.

15 დეკემბერს, სტრასბურგში ევროპარლამენტმა პლენარულ სხდომაზე განახლებული შეჩერების მექანიზმს დაუჭირა მხარი. აღნიშნული იყო სავიზო ლიბერალიზაციის ამოქმედების წინაპირობა.

შემდგომი პროცედურის თანახმად, პლენარულზე, კენჭისყრის დადებითი შედეგით დასრულების შემთხვევაში, განახლებულ რეგულაციას ფორმალურად დაამტკიცებს ევროკავშირის საბჭო მინისტრების დონეზე.

ევროპარლამენტის პრეზიდენტისა და ევროკავშირის საბჭოს თავმჯდომარე ქვეყნის შესაბამისი წარმომადგენლის მიერ საკანონმდებლო ცვლილების ხელმოწერის შემდეგ რეგულაცია გამოქვეყნდება ოფიციალურ ჟურნალში.