შინაგან საქმეთა მინისტრის მოადგილის, ნინო ცაციაშვილის განცხადებით, არჩევნების დღეს, დილის რვა საათიდან მცირე ინციდენტები დაფიქსირდა, თუმცა მნიშვნელოვანი დარღვევები არ ყოფილა.

"ერთდერთი საქმე გახლავთ, რაზეც გამოძიება გახლავთ ზვიად კუპრავას მიმართ განხორციელებული ძალადობის ფაქტზე. ინიციატორი გახლავთ თვითონ ზვიად კუპრავა და რამდენიმე წუთის წინ გამოძიება დავიწყეთ ძალადობის მუხლით", — განაცხადა ცაციაშვილმა.

გარდა ამისა, უწყებაში ამბობენ, რომ უსაფრთხო საარჩევნო გარემოს უზრუნველყოფის მიზნით შექმნილია პოლიციის მობილური ჯგუფები, რომლებიც მთელი დღის განმავლობაში დაიცავენ საზოგადოებრივ წესრიგს.

შინაგან საქმეთა სამინისტროში, ასევე, შექმნილია სპეციალური ჯგუფი, რომელიც კოორდინაციას უწევს რეგიონულ დანაყოფებს და უფლებამოსილების ფარგლებში ახორციელებს მონიტორინგს.