დღეს, 12 იანვრის სხდომაზე, ევროპარლამენტის სამოქალაქო თავისუფლების, მართლმსაჯულებისა და საშინაო საკითხების კომიტეტმა (LIBE) საქართველოსთვის სავიზო ლიბერალიზაციის მინიჭებას მხარი დაუჭირა 42 ხმით 2-ის წინააღმდეგ. პლენარულ სესიაზე საკითხს, სავარაუდოდ, თებერვალში უყრიან კენჭს. ამის შესახებ, რადიო თავისუფლების ბრიუსელის ბიუროს კორესპონდენტი რიკარდ იოზვიაკი წერს ტვიტერზე:

15 დეკემბერს, სტრასბურგში ევროპარლამენტმა პლენარულ სხდომაზე განახლებული შეჩერების მექანიზმს მხარი დაუჭირა, 485 ხმით, 132-ის წინააღმდეგ. აღნიშნული იყო სავიზო ლიბერალიზაციის ამოქმედების წინაპირობა და საშუალებას აძლევს წევრ ქვეყნებს, რომ ევროკომისიას მოთხოვოს დროებით შეაჩეროს უვიზო მიმოსვლა. მექანიზმის ამოქმედება ევროკავშირის წევრ ქვეყნებში, საჭიროების შემთხვევაში, ჭარბ მიგრაციულ ნაკადებს შეაჩერებს.

საგარეო საქმეთა სამინისტროს ცნობით, კომიტეტის კენჭისყრის შემდეგ, გაიმართება კენჭისყრა ევროპარლამენტის უახლოეს პლენარულ სესიაზე, რის შემდეგაც განახლებულ რეგულაციას ფორმალურად დაამტკიცებს ევროკავშირის საბჭო მინისტრების დონეზე.

ევროპარლამენტის პრეზიდენტისა და ევროკავშირის საბჭოს თავმჯდომარე ქვეყნის შესაბამისი წარმომადგენლის მიერ საკანონმდებლო ცვლილების ხელმოწერის შემდეგ რეგულაცია გამოქვეყნდება ოფიციალურ ჟურნალში.

საქართველოს მოქალაქეები, რომლებიც ფლობენ ბიომეტრიულ პასპორტს შეძლებენ ისარგებლონ შენგენის წევრ ქვეყნებში მოკლევადიანი უვიზო მიმოსვლის რეჟიმით.