საქართველოში ევროკავშირის ელჩის, კარლ ჰარცელის განცხადებით, ევროკავშირსა და საქართველოს შორის ურთიერთობებისათვის მთავარია არა ის, თუ ვინ გაიმარჯვებს 31 ოქტომბერს გასამართ არჩევნებში, არამედ ის, თუ როგორ იქნება მოპოვებული ეს გამარჯვება. ჰარცელის თქმით, არჩევნების ჩატარებაზე პასუხისმგებლობა ყველა პოლიტიკურმა მოთამაშემ უნდა აიღოს. ამის შესახებ მან ევროპელ დიპლომატთა სადამკვირვებლო გუნდის შესახებ საუბრისას განაცხადა

"ჩვენი მიზანია, დავეხმაროთ ეუთო/ოდირის მისიის ძალისხმევას. ჩვენ, ასევე, ადგილობრივ დამკვირვებელ ორგანიზაციებთანაც მჭიდროდ ვითანამშრომლებთ. ეს არის ევროკავშირის ურყევი მხარდაჭერის დემონსტრირება ქართული დემოკრატიის მიმართ და ჩვენი მზადყოფნა, რომ უფრო მეტად გავამყაროთ ნდობა ამ არჩევნების მიმართ დამატებითი საერთაშორისო "თვალისა და ყურის" საშუალებით", — განაცხადა ერვოკავშირის ელჩმა.

მან, აგრეთვე, მოქალაქეებს არჩევნებში წასვლისკენ მოუწოდა. საპარლამენტო არჩევნები საქართველოში ხვალ, 31 ოქტომბერს გაიმართება.