შეერთებული შტატების არჩეული პრეზიდენტი აცხადებს, რომ რუსეთთან არაფერი აქვს საერთო და გავრცელებული ინფორმაცია, რომლის მიხედვით რუსეთი ტრამპის მაკომპრომეტირებელ მასალებს ფლობს ტყუილია.

"რუსეთმა ახლახანს თქვა, რომ პოლიტიკური ოპონენტების მიერ დაფინანსებული გადაუმოწმებელი ინფორმაცია "სრული და აბსოლუტური ფაბრიკაცია, სრული სისულელეა." დიდი უსამართლობაა!"

"რუსეთს არასდროს გამოუყენებია ჩემზე ზეწოლის ბერკეტები. არაფერი მაქვს საერთო რუსეთთან - არანაირი გარიგება, არანაირი სესხი, არაფერი!"

"არჩევნები მარტივად მოვიგეთ, დიდებული "მოძრაობა" შემოწმდა, არაპატიოსანი ოპონენტები ცდილობენ დააკნინონ ჩვენი გამარჯვება არასწორი ინფორმაციით. სამწუხარო მდგომარეობაა!"

"სადაზვერვო სააგენტოებს არ უნდა დაეშვათ არასწორი ინფორმაციის "გაჟონვა" საზოგადოებაში. უკანასკნელი გასროლა ჩემი მიმართულებით. ნაცისტურ გერმანიაში ვცხოვრობთ?"

11 იანვარს, CNN-მა გაავრცელა ინფორმაცია, რომლის მიხედვით, შესაძლოა, რუსეთის ფედერაციის სპეცსამსახურები ფლობენ ამერიკის არჩეული პრეზიდენტის, დონალდ ტრამპის მაკომპრომეტირებელ მასალებს, მათ შორის ფინანსებთან დაკავშირებით. CNN-ის ცნობით, აღნიშნული ინფორმაცია უშიშროებისა და დაზვერვის სამსახურების ხელმძღვანელებმა გასულ კვირას აშშ-ს პრეზიდენტს, ბარაკ ობამასა და დონალდ ტრამპს მიაწოდეს. ამ შეხვედრის შესახებ, რომელზეც ინფორმაცია ჯერ არ გასაჯაროებულა, CNN რამდენიმე მნიშვნელოვან წყაროზე დაყრდნობით წერს, რომელთა შორის არიან როგორც კონგრესის, ისე უშიშროების სამსახურების მაღალჩინოსნები. ტელეარხის ცნობით, ობამასა და ტრამპს შეხვდნენ CIA-ის, FBI-ის, NSA-სა და ეროვნული დაზვერვის სამსახურის ხელმძღვანელები, რომლებმაც შეხვედრაზე წარმოადგინეს 35-გვერდიანი საიდუმლო ანგარიშის ორგვერდიანი მიმოხილვა.