ლეობორისტული პარტიის ლიდერის, შალვა ნათელაშვილის განცხადებით, მათი გეოპოლიტიკური ხედვები შეიცვალა და ადრე თუ დასავლურ სტრუქტურებში ინტეგრაციას არ ემხრობოდნენ, ახლა გამოსავლად საქართველოში ამერიკული ბაზების გახსნა მიაჩნიათ.

"იყო პერიოდი ვამბობდით, არ გვინდა სამხედრო ბაზები, არ გვინდა არც ნატო, არც კატო და არც პუტინის ორგანიზაცია. ვიყოთ ნეიტრალურები, ვიყოთ ევრაზიის შვეიცარია, ევრაზიის ავსტრია, გავხსნათ კარები ოთხივე მხრიდან, შემოვიდეთ ინვესტიციები, ტურისტები, ფესტივალები... მაგრამ არ გამოვიდა ეგრე, მეგობრებო. იქამდე მივიდა საქმე, რომ გეოპოლიტიკურ ჭიდილში გავიჭყლიტეთ და გავწყდით შუაზე. რუსეთი ყოველდღე გვიღობას ტერიტორიებს. გამოსავალი არის რა? გამოსავალი არის ერთადერთი — საქართველოს ტერიტორიაზე შეერთებული შტატების სამხედრო ბაზების გახსნა, სანამ ნატოში მიგვიღებენ, ან რუსეთი მოვა აზრზე, რომ სისულელეს აკეთებს", — განაცხადა ნათელაშვილმა ფორმულას ეთერში.

ნათელაშვილის თქმით, ახლა ნეიტრალიტეტზე რომ დაიწყონ ისევ საუბარი, რუსეთი ვაკესა და ვერასაც შემოიღობავდა.