თავდაცვის სამინისტროს განცხადებით, მთავარი არხის მიერ დავით ხვიბლიანზე გავრცელებული ინფორმაცია სიმართლეს არ შეესაბამება.

"ნაციონალური მოძრაობის პარტიული ტელევიზიის მთავარი არხის დირექტორის, ნიკა გვარამიას მიერ გავრცელებული დეზინფორმაციის თანახმად, სენაკის ბაზაზე მიმდინარეობს ზუგდიდში, ერთ-ერთი ბანკის ფილიალზე განხორციელებულ თავდასხმისას აყვანილი ერთ-ერთი მძევლის, დავით ხვიბლიანის წამება და თავისუფლების უკანონო აღკვეთა", — აცხადებენ სამინისტროში.

მათივე თქმით, დავით ხვიბლიანი ამ დროისთვის მუშაობის დისტანციურ რეჟიმზეა და ამ განცხადებების გამო გეგმავს სასამართლოს მიმართოს.

თავდაცვის სამინისტროს განცხადებით, მთავარმა არხმა თემურ ხვიბლიანი თავდამსხმელად დაასახელა, რის გამოც, ის გეგმავს სამართლებრივ დავას. დავით და თემურ ხვიბლიანების მხრიდან სამართლებრივი დავის დაწყების შემთხვევაში კი სამინისტროს თქმით, მათ მხარდაჭერას უზრუნველყოფს.

"სამართლებრივ დავას უსაფუძვლო ბრალდებებისა და ცილისწამების გამო, კიდევ ერთი სამხედრო მოსამსახურე, თემურ ხვიბლიანი გეგმავს. პარტიულმა ტელევიზია მთავარმა არხმა, 22 ოქტომბერს მომზადებულ სიუჟეტში, თემურ ხვიბლიანი თავდამსხმელად დაასახელა. დავით და თემურ ხვიბლიანების მხრიდან სამართლებრივი დავის დაწყების შემთხვევაში, თავდაცვის სამინისტრო უზრუნველყოფს მათ მხარდაჭერას კანონმდებლობით გათვალისწინებულ ფარგლებში", — აცხადებენ უწყებაში.

სამინისტროს თქმით, აღნიშნული ქმედება თავდაცვის ძალების ავტორიტეტისა და იმიჯის დისკრედიტაციის მორიგი მცდელობაა.

დავით ხვიბლიანი ზუგდიდში შეიარაღებული თავდასხმის დროს აყვანილი 43 მძევლიდან ერთ-ერთი იყო. ნიკა გვარამიამ ხვიბლიანზე განაცხადა, რომ ის სინამდვილეში გამტაცებლის თანამზრახველი იყო.