ევროპული საქართველოს ლიდერმა, დავით ბაქრაძემ, პარტიის იმერეთის მაჟორიტარობის კანდიდატებთან, აკაკი ბობოხიძესთან, გიგი წერეთელთან და სერგო რატიანთან ერთად ქუთაისში, ყოფილი პარლამენტის შენობის წინ, მოსახლეობათან შემაჯამებელი შეხვედრა გამართა.

პარტიის მაჟორიტარობის კანდიდატი სამტრედიის, წყალტუბოს, ვანისა და ხონის ოლქში, აკაკი ბობოხიძე ამბობს, რომ ივანიშვილის ხელისუფლებამ გაყინა დრო და შეაჩერა ქვეყნის განვითარება, ხოლო, დღეს, ქვეყნის წინსვლას სჭირდება კომპეტენტური გუნდი და გარდამტეხი ცვლილებები.

"თუ სად მიიყვანა ბიძინა ივანიშვილმა და მისმა ხელისუფლებამ ჩვენი ქვეყანა, აი ეს არის ნათელი მაგალითი. 2012 წლის შემდეგ აქ არ შეცვლილა არაფერი — დრო გაიყინა და საქართველოც გაიყინა. იმისთვის, რომ შევადაროთ, ვის შეუძლია ქვეყნის წინ წაყვანა, გავიხსენოთ რა ჩაიბარა წინა ხელისუფლებამ, რომლის მთავარი გუნდიც სწორედ ევროპული საქართველოს ლიდერები იყვნენ — ჩაიბარა უშუქო, ბანდიტებით და კრიმინალებით დახუნძლული ქვეყანა, პენსია და ხელფასებ გაყინული ქვეყანა და 2012 წელს დავტოვეთ ფეხზე დამდგარი ქვეყანა. 2012 წელს რაც გადავაბარეთ ხელისუფლება ივანიშვილს, სამწუხაროდ დრო გაყინა და შეჩერდა ყველაფერი.

ამიტომ, თუ გვინდა წინსვლა, თუ გვინდა ჩვენი შვილების და მომავლის უზრუნველყოფა, 31 ოქტომბერს სრულიად საქართველო უნდა დავდგეთ და ისე როგორც წალენჯიხიდან, თელავიდან, ბათუმიდან დაიძრა 2003 წელს მთელი საქართველო და მოიშორა მოუშორებელი ჭირი შევარდნაძის სახით, ზუსტად ისე მთელმა საქართველომ უნდა მოვიშოროთ ჭირი რომელსაც სახელად ჰქვია ქართული ოცნება და ბიძნა ივანიშვილი", — განაცხადა ბობოხიძემ.