ნაციონალური მოძრაობის წევრის, სალომე სამადაშვილის თქმით, ე.წ. კასრების საქმე დემაგოგიაა. მისივე თქმით, მან არ იცის ვინ ჩაწერა ის ფარული ჩანაწერები და შესაბამისი სამართლებრივი რეაგირებაც არ ყოფილა.

რუსთავი 2-ის ეთერში სალომე სამადაშვილს კასრებთან და ღირსების შემლახველ ჩანაწერებთან დაკავშირებით ჰკითხეს.

"ეს რაღაცა კასრების თემა არის დემაგოგია. თქვენ ახლა გადადიხართ ისეთ ტერიტორიაზე, რომელიც არის შავ-ბნელი რუსული პროპაგანდის ხერხებით შექმნილი რაღაც მითები. ასე არის ნამდვილად", — განაცხადა მან.

როგორც სამადაშვილი ამბობს, პრობლემა ისაა, რომ "დანაშაული, რომელიც სავარაუდოდ წინა ხელისუფლების დროს იქნა ჩადენილი", არავის გამოუძიებია.

"არც მე არ ვიცი ეს კადრები ვინ ჩაწერა და არც თქვენ არ იცით და სამართლებრივი რეაგირება, რომელიც ამაზე უნდა ყოფილი, არ მომხდარა. ყველა კონკრეტულ დანაშაულს კონკრეტული ავტორი ჰყავს და დამოუკიდებელმა გამოძიებამ და სასამართლომ უნდა დაადგინოს, ვინ არის ავტორი და დასაჯოს", — აღნიშნა პარლამენტის დეპუტატმა.