მთავარმა არხმა ჩანაწერი გამოაქვეყნა, სადაც მათი მტკიცებით, ისმის ავთანდილ გალდავასა და გამტაცებელს დიალოგი, როცა გალდავა გამტაცებელს სთხოვს, რომ 4-ის ნაცვლად 3 მძევალი წაიყვანოს. ჩანაწერის ავთენტურობა დადასტურებული არ არის.

გამტაცებელი: არავინ არ დაშავდება აქ და თუ დაშავდება ვინმე, იქნება თქვენი ბრალი.

გალდავა: გავიგეთ, რომ არ დაშავდება და იქნება ჩვენი ბრალი. არანაირი ზედმეტი მოქმედება არ იქნება. რამდენი კაცი მიგყავს?

გამტაცებელი: 5 კაცი ვიქნებით შენიანად.

გალდავა: 4 წავიდეთ.

გამტაცებელი: არა.

გალდავა: გთხოვ. 5 კაცი რაღაში გინდა, გამაგებინე, ადამიანო.

გამტაცებელი: რაც მეტი ვიქნებით, მით უკეთესი.

გალდავა: გავიგეთ, ძმაო, მაგრამ ის 3 კაცი, რა, ცოტანი ვართ, დედას გაფიცებ? გეხვეწები, გთხოვ კაცურად, კაცი ხო ხარ?

გამტაცებელი: ბევრს საუბრობ.

გალდავა: გთხოვ.

გამტაცებელი: გასაგებია, მაგრამ ხომ ვუშვებ სხვას.

გალდავა: კი, უშვებ, მაგრამ ფიზიკურად ხო ვერ წაიყვან ამათ ისედაც. გეხვეწები, 3 კაცი წავიდეთ.

გამტაცებელი: დამშვიდდი!

გალდავა: გეხვეწები.

გამტაცებელი: დამშვიდდი-მეთქი!

გალდავა: კაი, მშვიდად ვარ. მართლა მეგობრულად გთხოვ.

გამტაცებელი: გასაგებია, მაგრამ დამშვიდდი! არ მინდა შენი აზრები, შენთვის შეინახე!

გალადავა: აზრებს არ გაწვდი, გთხოვ-მეთქი.

21 ოქტომბერს საქართველოს ბანკის ზუგდიდის ფილიალში შეიარაღებული პირი შეიჭრა, რომელმაც მძევლები აიყვანა. ის ნახევარ მილიონ დოლარს, ასევე, ვერტმფრენს ან მანქანით, მძევლებთან ერთად ტერიტორიის უსაფრთხოდ დატოვების გარანტიას ითხოვდა. თავდამსხმელი მძევლის შუამავლობით ტელევიზიებს ვიდეოზარით დაუკავშირდა. მოთხოვნების შესასრულებლად თავდამსხმელმა პოლიციას 2 საათი მისცა, თუმცა დროის ამოწურვის შემდეგ მას საჯაროდ ახალი პირობები არ წამოუყენებია.

ღამის 11 საათისთვის თავდამსხმელმა სამ მძევალთან ერთად საქართველოს ბანკის ტერიტორია დატოვა და გაურკვეველი მიმართულებით წავიდა, დანარჩენი მძევლები კი სამართალდამცავებმა შენობიდან გამოიყვანეს. დილის ხუთი საათისთვის ცნობილი გახდა, რომ თავდამსხმელმა სამივე მძევალი გაათავისუფლა და თავად გაიქცა.

მძევლებს შორის იყო სამეგრელო-ზემო სვანეთის პოლიციის დეპარტამენტის ხელმძღვანელი ავთანდილ გალდავა. გავრცელებული ინფორმაციით, შეიარაღებულ პირთან მოლაპარაკებებს ის აწარმოებდა.

ამ დროისთვის თავდამსხმელის ადგილმდებარეობის ან ვინაობის შესახებ ინფორმაცია არ ვრცელდება. თავდასხმის დროს საქართველოს ბანკში მყოფი არცერთი პირი არ დაშავებულა.

გაიგე მეტი: