ასტრონომთა გუნდი გაბედულ პროგნოზს აკეთებს: 2022 წელს ვარსკვლავების წყვილი ერთმანეთს შეერწყმება და აფეთქდება, რის შედეგადაც ღამის ცაზე ერთ-ერთ ყველაზე კაშკაშა ობიექტს ვიხილავთ. საკმაოდ რთულია იწინასწარმეტყველო, როდის მოხდება ასეთი ვარსკვლავური კატასტროფები, მაგრამ ამ ორმაგი სისტემის სასიკვდილო ცეკვა იმდენად კარგადაა დოკუმენტირებული, რომ მათი შეჯახება რამდენიმე წელიწადში გარდაუვალია - ასე აცხადებენ მკვლევარები.

ასტრონომებმა ამ წყვილის შესწავლა 2013 წელს დაიწყეს. მაშინ მათ ჯერ კიდევ არ იცოდნენ, ეს ორმაგი ვარსკვლავური სისტემა იყო თუ პულსარი. [ეს უკანასკნელი სწრაფად მბრუნავი ნეიტრონული ვარსკვლავია, რომელიც ჩნდება მასიური ვარსკვლავის ჩაშლის შედეგად. ის ძალიან, ძალიან დიდი სიმკვრივის მქონე ობიექტია]. მათ აღმოაჩინეს, რომ ორბიტის სიჩქარე თანდათან იზრდებოდა, რაც იმის მანიშნებელი იყო, რომ ეს ორი მნათობი ერთმანეთს უახლოვდებოდა. ეს წყვილი უკვე იმდენად ახლოსაა ერთმანეთთან, რომ ფაქტობრივად საზიარო ატმოსფერო აქვთ. KIC 9832227-ს ქცევამ მკვლევრებს გაახსენა სხვა ორმაგი სისტემა, სახელად V1309 Scorpii, რომელსაც ატმოსფერო ასევე გაერთიანებული ჰქონდა. ეს ორი ვარსკვლავი უფრო და უფრო ასწრაფდა და 2008 წელს მოულოდნელად აფეთქდა.

აჩქარებული ბრუნვის დასადასტურებლად ორწლიანი საგულდაგულო შესწავლის შემდეგ ამერიკული ასტრონომიული საზოგადოების წლიურ შეხვედრაზე ცნობილი გახდა, რომ წყვილი აფეთქდება, როგორც წითელი ნოვა (ორმაგი ვარსკვლავის შერწყმის შედეგად გამოწვეული აფეთქება). ეს დაახლოებით ხუთ წელიწადში მოხდება.

მეცნიერები მომდევნო წლების განმავლობაში გააგრძელებენ KIC 9832227-ზე დაკვირვებას, რათა პროგნოზები დააზუსტონ და უკეთ შეისწავლონ, როგორ სრულდება სიცოცხლის ციკლი წითელ ნოვებში. ამ მოვლენაზე დაკვირვება მოყვარულ ასტრონომებსაც შეუძლიათ იმის გასაზომად, თუ როგორ იცვლება ობიექტების სიკაშკაშე აფეთქების მოახლოების პარალელურად.

როგორც ჩანს, წინ არნახული კოსმოსური შოუ გველოდება.