თავისუფალი დემოკრატების ლიდერმა ირაკლი ალასანიამ დღეს, 17 მაისს, კაბელების საქმეზე არასამთავრობო ორგანიზაციებთან შეხვედრის შემდეგ თქვა, რომ თუ ამ საქმეზე ზემდგომმა ინსტანციებმა გამამართლებელი განაჩენი არ გამოიტანეს, საქმე სტრასბურგის სასამართლოში წავა.

ჟურნალისტის შეკითხვას, მიუხედავად იმისა, რომ სააპელაციო სასამართლოს იმედი არ აქვთ, აპირებენ თუ არა მაინც სააპელაციოში აღნიშნული განაჩენის გასაჩივრებას, ალასანიამ უპასუხა:

"სამართლებრივი ბრძოლა ყოველთვის უნდა გაგრძელდეს იმიტომ, რომ თუ საბოლოოდ,

თუ ქართულმა სასამართლოებმა არ მიიღეს სამართლიანი გადაწყვეტილება, სწორედ სტრასბურგში უნდა მივიდეს ეს საქმე

ირაკლი ალასანია

სააპელაციო სასამართლომ, შემდეგ უზენაესმა არ მიიღო სამართლიანი გადაწყვეტილება, სწორედ სტრასბურგში უნდა მივიდეს ეს საქმე. მე დარწმუნებული ვარ, რომ ეს ადამიანები გამართლდებიან, მაგრამ ამას შესაბამისი პროცედურების გავლა სჭირდება. რა თქმა უნდა, მურუსიძის სასამართლოს არც მე და არც თქვენ არ გწამთ და იცით რომ იქ შეკვეთილ გადაწყვეტილებას მიიღებენ".

ირაკლი ალასანიას განცხადებით, მათ ჯერ არ ჰქონიათ კომუნიკაცია პრეზიდენტთან კაბელების საქმეზე გასამართლებული თავდაცვის სამინისტროს თანამშრომლებს შეწყალებასთან დაკავშირებით, თუმცა, მას იმედი აქვს, რომ პრეზიდენტი "უყურებს, აფასებს მოვლენებს და გადაწყვეტილებასაც შესაბამისად მიიღებს".

თავისუფალი დემოკრატები საპროტესტო აქციებს აანონსებენ, რადგან მიიჩნევენ, რომ ე.წ. კაბელების საქმეზე ხუთი პირის გასამართლებას პოლიტიკური მოტივები უდევს საფუძვლად.

ე.წ. კაბელების საქმეზე ბრალდებული თავდაცვის სამინისტროს თანამშრომლები ნუგზარ კაიშაური, დავით წიფურია, არჩილ ალავიძე, გიორგი ლობჟანიძე და გიზო ღლონტი თბილისის საქალაქო სასამართლოს მოსამართლე ბესიკ ბუგიანიშვილმა დამნაშავედ სცნო და მათ 7-წლიანი პატიმრობა მიუსაჯა. პროკურატურა დაკავებულებს სახელმწიფოს კუთვნილი 4 მილიონის გაფლანგვას ედავება, რასაც ბრალდებულები არ ეთანხმებიან და საქმეს პოლიტიკურად მოტივირებულს უწოდებენ. თავის მხრივ, პროკურატურა მიიჩნევს, რომ სასამართლომ ადეკვატური და მტკიცებულებებზე დამყარებული გადაწყვეტილება მიიღო.