რეჟისორმა ჯასტინ ლიმ, რომელმაც გახმაურებული ფრენჩაიზის ფორსაჟი (Fast and Furious) მესამე, მეოთხე, მეხუთე, მეექვსე და მეცხრე ფილმები გადაიღო, განაცხადა, რომ ამ საგის კიდევ ორ ფილმს გადაიღებს და ამით ფორსაჟის ძირითადი ხაზიც დასრულდება.

მართალია, ფილმების სერია, რომელიც უკვე ორი ათწლეულია გრძელდება, უახლოეს მომავალში ფინიშს მიუახლოვდება, მაგრამ, Variety-ს ინფორმაციით, ეს სულაც არ ნიშნავს, რომ ამ სამყაროს შესახებ დამოუკიდებელ ფილმებს ვერ ვიხილავთ: ფორსაჟის სიუჟეტური ხაზი დასრულდება, მაგრამ, დიდი ალბათობით, უნდო ველოდოთ პრიქველებს, სიქველებსა თუ სპინოფებს, რომლებიც სხვადასხვა დროს კონკრეტული პერსონაჟების ირგვლივ განვითარდება.

გავრცელებული ინფორმაციით, სავარაუდოდ, ბოლო ორი სურათი არა მე-10 და მე-11 ფილმი იქნება, არამედ მეათე ფილმი გაიყოფა ორ ნაწილად, რომლებიც ძირითად კვლავ ვინ დიზელის, მიშელ როდრიგესის, ტაირის გიბსონის, ნატალი ემანუელისა და სონ კანის პერსონაჟების შესახებ მოგვითხრობს.

კადრი ფორსაჟის მეცხრე ფილმიდან.

ფოტო: Universal Pictures

ფორსაჟის ფრენჩაიზის ჯერჯერობით ბოლო ფილმი მეცხრე ნაწილია, რომლის პრემიერაც წელს გაზაფხულზე უნდა შემდგარიყო, თუმცა პანდემიის გამო მისი პრემიერა 2021 წლამდე გადაიდო. აღსანიშნავია, რომ სწორედ ამ ფილმის გადაღებები საქართველოში მიმდინარეობდა და პირველ გავრცელებულ ტრეილერში ნაცნობი ქართული გარემოც შევნიშნეთ.

ბლოკბასტერების ამ ცნობილმა სერიამ სტარტი 2001 წელს აიღო, როცა პირველი ფილმი გამოვიდა და დღემდე ერთ-ერთი ყველა მაღალი შემოსავლების მქონე ფრენჩაიზია, რომლის საერთო შემოსავლები $5.8 მილიარდს აღწევს.