"მოდი, აბა, თუ მაგარი ბიჭი ხარ", — ლეიბორისტული პარტიის ლიდერი, შალვა ნათელაშვილი ქართული ოცნების თავმჯდომარეს, ბიძინა ივანიშვილს დებატებში იწვევს.

ივანიშვილის დებატებში გამოწვევაზე შალვა ნათელაშვილმა დღეს, 20 ოქტომბერს ბრიფინგზეც ისაუბრა. მისივე თქმით, მმართველი პარტია დებატებში მონაწილეობაზე უარს ამბობს.

"მოვუწოდებ ბიძინა ივანიშვილს, დამიჯდეს სატელევიზიო დებატებში, სადაც ბოლომდე იქნება ის მხილებული, როგორც მატყუარა, "გადამგდები", მტაცებელი, ქვეყნის დამაქცევარი, რის შემდეგ წაგებამდე, თვითონ დაკარგავს პოლიტიკური მოღვაწეობის სურვილს", — განაცხადა ნათელაშვილმა.

გარდა ამისა, იგი მზადაა, რომ კორონავირუსის გამო ივანიშვილთან დებატები ვირტუალურად წარმართოს.