ევროპული საქართველოს საარჩევნო შტაბის ხელმძღვანელის, სერგი კაპანაძის თქმით, პარტია 21 ოქტომბერს ქართული ოცნების ლიდერის, ბიძინა ივანიშვილის ბიზნეს-ცენტრთან საავტომობილო აქციას მოაწყობს.

კაპანაძის განცხადებით, არჩევნებამდე ორი კვირით ადრე, მნიშვნელოვანია, რომ პოლიტიკური აქტივობა არ შეწყდეს და არ მიეცეს "ივანიშვილს ფორა, რომ გაეზარდოს ხელისუფლების შენარჩუნების შანსი", აქედან გამომდინარე, ისინი მთელი საქართველოს მასშტაბით აქციას, სახელად — დაუპიპინე ბიძინას გამართავენ.

"შეკრების უსაფრთხო ალტერნატივაა იგივე რაოდენობის ადამიანების გამოსვლა, ოღონდ ავტომანქანებით და სიგნალის მიცემა ივანიშვილისთვის, რომ მისი დრო ამოიწურა. ჩვენ გვექნება აქციები საქართველოს თითქმის ყველა ქალაქში, ასევე, თბილისში და ასევე, ავტომანქანების კოლონები შემოვლენ თბილისში და აქ დააფიქსირებენ პროტესტს, უშუალოდ, ივანიშვილის ბიზნეს ცენტრთან. ეს იქნება აქცია, კოდური სახელწოდებით, დაუპიპინე ბიძინას", — განაცხადა კაპანაძემ.

მისი თქმით, მთავრობის ერთადერთი სურვილი ახლა ის არის, რომ საარჩევნო აქტივობები არ იყოს და ოპოზიციურმა პარტიებმა არ იაქტიურონ. კაპანაძემ მოქალაქეებს მოუწოდა, რომ ხელისუფლების მიმართ თავიანთი უარყოფითი პოზიცია სიგნალებით დააფიქსირონ.