გირჩის ლიდერის, ზურაბ ჯაფარიძის განცხადებით, საარჩევნო კამპანიის დროს ვისაც უნდა, ისეთ აქციას ჩაატარებს. მისივე თქმით, აქციაზე მისვლა არა პარტიის, არამედ პიროვნების პასუხისმგებლობაა. ამის შესახებ მან პარტიის ოფისში ბრიფინგზე განაცხადა.

"გინდ ნაციონალური მოძრაობა იყოს და გინდ სხვა, პარტიამ თქვა ასეთი ღონისძიება მაქვს, ვინც გინდათ მოდით და მოვიდნენ. როგორც უნდა, ისე მივიდნენ და როგორც უნდათ, ისე მოიქცნენ. საარჩევნო კამპანიაა და ვისაც უნდა, ისეთ აქციას ჩაატარებს", — განაცხადა ჯაფარიძემ.

მისივე თქმით, თუ ადამიანების საკუთარი ნებით არიან მისულები აქციაზე, მათი გადასაწყვეტია როგორ მოიქცევიან:

"მათი გადასაწყვეტია, მივლენ თუ არა და როცა მივლენ, დაიცავენ თუ არა დისტანციას. მათი გადასაწყვეტი, პირბადეს გაიკეთებ თუ არა, თუ უნდათ, სკაფანდრი ჩაიცვან. ეს არის ინდივიდუალური პასუხისმგებლობა. არ არსებობს კოლექტიური პასუხისმგებლობა. უნდა გამოვიდეთ ამ საბჭოთა კავშირიდან".

16 ოქტომბერს კოვიდპანდემიის ფონზე ბათუმში ნაციონალურმა მოძრაობამ მრავალრიცხოვანი აქცია გამართა. აქციაზე არ იყო დაცული სოციალური დისტანცია და მოქალაქეებს პირბადეები არ ეკეთათ.

შეკრებილებს ექსპრეზიდენტმა, მიხეილ სააკაშვილმა მიმართა და ამტკიცებდა, რომ ხელისუფლებამ ბათუმში კოვიდინფექცია ხელოვნურად გაავრცელა. ის ხალხს დაპირდა, რომ მომავალში საქართველოს ვერცერთი ვირუსი მოერევა.

ჟურნალისტების კითხვაზე, იღებდა თუ არა ოპოზიცია პასუხისმგებლობა ბათუმში რეკომენდაციების გარეშე ჩატარებულ აქციაზე, პარტიის ლიდერმა, გრიგოლ ვაშაძემ უპასუხა:

"პასუხისმგებლობა აბსოლუტურად მთლიანად ეკისრება კორონავირუსს და შემიძლია მიგაგზავნოთ კორონავირუსთან".

სახალხო დამცველი ნინო ლომჯარიას თქმით, როცა გავრცელების კრიტიკულ მასშტაბს მიღწეულ რეგიონში შესაძლებელია უპირბადოდ, დისტანციის დაუცველად შეიკრიბოს ათასობით ადამიანი, ორგანიზატორების მხრიდან "უკიდურესი უპასუხისმგებლობა".

ამავე თემაზე: