აზერბაიჯანის პრეზიდენტის, ილჰამ ალიევის თქმით, აზერბაიჯანმა თურქეთიდან შესყიდული დრონების საშუალებით სომხეთს 1 მილიარდის ღირებულების ზიანი მიაყენა. ამის შესახებ მან FRANCE 24-თან მიცემულ ინტერვიუში ისაუბრა.

"ესაა თანამედროვე და დახვეწილი იარაღი და შემიძლია გითხრათ, რომ მხოლოდ დრონებით, რომელიც თურქეთისგან შევიძინეთ, 1 მილიარდის რაოდენობის სომხური სამხედრო აღჭურვილობა გავანადგურეთ", — განაცხადა ალიევმა.

მისი თქმით, არასასურველია, ქვეყანაში თურქული დრონების რაოდენობა გაასაჯაროვოს, თუმცა ამბობს, რომ აქვს "საკმარისი რაოდენობა".

რაც შეეხება, ზოგადად, თურქეთის უშუალო სამხედრო ჩართულობას, ალიევის თქმით, რომ აზერბაიჯანი მათგან ისევე ყიდულობს იარაღს, როგორც სხვა ქვეყნებისგან და ეს "სამხედრო ჩართულობას" არ ნიშნავს.

"არ არსებობს თურქეთის სამხედრო ჩართულობა, ჩვენ ვიყენებთ თურქეთის სამხედრო აღჭურვილობას, ეს მართალია, თუმცა ჩვენ, ასევე ვიყენებთ რუსეთის, ისრაელის და სხვა ქვეყნების ტექნიკას, ჩევნ ვყიდულობთ მათ", — განაცხადა ალიევმა.

რაც შეეხება სომხეთს, ალიევს "უკვირს", თუ საიდან აქვს სომხურ მხარეს სამხედრო აღჭურვილობა, მისი აზრით, სომხები მას "უფასოდ იღებენ".

მთიან ყარაბაღში სამხედრო დაპირისპირება 27 სექტემბერს განახლდა. სომხეთი და აზერბაიჯანი პროვოცირებაში ისევ ერთმანეთს ადანაშაულებენ, თვითაღიარებული ყარაბაღი კი მომხდარზე პასუხისმგებლობას აზერბაიჯანის პრეზიდენტს ილჰამ ალიევს აკისრებს.

ბოლო მონაცემებით ბრძოლები რამდენიმე სხვადასხვა ლოკაციაზე მიმდინარეობს, ყველაზე აქტიური მათ შორის ყარაბაღის სამხრეთ და ჩრდილოეთ ნაწილებია. გარდაცვლილთა საერთო რიცხვი, როგორც სამხედროებს, ასევე, სამოქალაქო პირებს შორის რამდენიმე ასეული ადამიანია. აღსანიშნია, რომ აზერბაიჯანი გარდაცვლილ სამხედროებზე ინფორმაციას არ ავრცელებს, მაშინ, როცა სომხური მხარე აცხადებს, რომ მოწინააღმდეგეს ასეულობით ჯარისკაცი მოუკლა. თვითაღიარებული არცახის რესპუბლიკის (ყარაბაღი) პრეზიდენტის განცხადებით, განადგურებულია ცალკეული ქალაქებისა და სოფლების ინფრასტრუქტურა.

რუსეთის შუამავლობით, სომხეთი და აზერბაიჯანი ჰუმანიტარული მიზნით ცეცხლის შეწყვეტაზე არიან შეთანხმებული. შეთახნმება ძალაში 10 ოქტომბრის, 20:00 საათიდან უნდა შესულიყო, თუმცა მას შემდეგ ცეცხლი არ შეწყვეტილა და მხარეები ერთმანეთს ხელშეკრულების დარღვევაში ადანაშაულებენ.