განათლების სამინისტროს ინფორმაციით, საჩხერის ილია ჭავჭავაძის სახელობის მე-2 საჯარო სკოლა საერთაშორისო კონკურსზე მსოფლიოს 100 წარმატებული სკოლის ჩამონათვალში მოხვდა. განათლების მინისტრ მიხეილ ჩხენკელის თქმით, ეს წარმატება საჩხერის საჯარო სკოლაში სწავლა-სწავლების დანერგილი ინოვაციური მიდგომების, უცხო ენებისა და STEM საგნების სწავლების ეფექტიანი მეთოდის აღიარებაა.

ჩხენკელი აღნიშნავს, რომ თანამედროვე სკოლის მოდელი, რომელიც განათლების რეფორმის ფარგლებში საჯარო სკოლებში ინერგება, 21-ე საუკუნის პედაგოგიური მეთოდების დანერგვას, პიროვნებაზე ორიენტირებულ საგანმანათლებლო გარემოს შექმნას, სკოლების თანამედროვე ტექნოლოგიებით აღჭურვასა და მოსწავლეებში კრიტიკული აზროვნების განვითარებას გულისხმობს.

"ასევე, აღსანიშნავია, რომ ერთ-ერთი კრიტერიუმი, რის საფუძველზეც სკოლა მსოფლიოს წარმატებულ სკოლებში მოხვდა პროფესიული უნარების განვითარების პროგრამაში მისი ჩართულობაა. პროგრამა მოსწავლეებს ზოგადი და პროფესიული განათლების ინტეგრირებულად მიღების შესაძლებლობას აძლევს და საქართველოში 700-ზე მეტ საჯარო სკოლაშია დანერგილი", — განაცხადა ჩხენკელმა.

მისივე თქმით, 2020 წლის მსოფლიოს განათლების კვირეულის მთავარი გზავნილი მსოფლიოსთვის 100 საუკეთესო სკოლის გამოცდილების ჩვენება იყო.