ევროპული საქართველოს ლიდერის, გიგი უგულავას თქმით, მათი პარტია, თავისუფალი ადამიანებისგან შედგება და განსხვავებული აზრი ყოველთვის საჯაროდ ითქმის. ასე უპასუხა უგულავამ ელენე ხოშტარიას განცხადებას, რომელიც გაემიჯნა უგულავას ვიდეომიმართვას, სადაც მიხეილ სააკაშვილზე იყო საუბარი. აღნიშნული განცხადება უგულავამ ტელეკომპანია ფორმულასთან გააკეთა.

"ჩვენი პარტია, განსხვავებით ნაციონალური მოძრაობისა, თავისუფალი ადამიანებისგან შედგება და ვისაც აქვს განსხვავებული აზრი, ეს აზრი კი არ იმალება, არამედ საჯაროდ ითქმის. ამას მე მხოლოდ და მხოლოდ მივესალმები. ელენეს კიდევ განსხვავბული პოზიციონირება აქვს. ის, მოგეხსენებათ, არის უკანასკნელი მოჰიკანი, ის, ნიკა მელია, შალვა შავგულიძე, შალვა ნათელაშვილი და ლევან ხაბეიშვილი. მე გადავწყვიტე, რომ ჩვენს ამომრჩეველთან ვიყო გულწრფელი, ვთქვა სიმართლე", — განაცხადა უგულავამ.

გიგი უგულავა ამით ევროპული საქართველოს წევრის და ვაკეში მაჟორიტარობის კანდიდატის, ელენე ხოშტარიას განცხადებას გამოეხმაურა, რომელიც საკუთარი პარტიის კამპანიის ფორმას, "მუშტი ბიძინას, იდაყვი მიშას" არ იზიარებს.

გიგი უგულავამ, დღეს Facebook-ზე გავრცელებულ ვიდეოში მიხეილ სააკაშვილი გააკრიტიკა. უგულავა ამბობდა, რომ კოალიციურ მთავრობაში მიხეილ სააკაშვილი არ უნდა იყოს.

"გარდამტეხი ცვლილებები გვჭირდება, რაც ამ მოჯადოებული წრის გარღვევას გულისხმობს. მთავარი ამოცანაა ოცნება 40%-ს ქვევით დარჩეს, ყველა ოპოზიცია ჯამურად იყოს ნაცმოძრაობაზე მეტი და კოალიციური მთავრობა სააკაშვილის გარეშე. დარწმუნებული ვარ და ვიცი, რომ როცა საქმე საქმეზე მიდგება, ენმ-შიც უმრავლესობა ამ აზრზე აღმოჩნდება", — აცხადებდა უგულავა.

მან, ასევე, მიხეილ სააკაშვილი ჯორჯ მარტინის საკულტო საგის, ყინულისა და ცეცხლის სიმღერის პერსონაჟს, სერსეი ლანისტერს შეადარა. სერსეი დიდებისა და ტახტის შენარჩუნებისთვის მებრძოლი პერსონაჟია, რომელიც იცილებს ყველას და ყველაფერს, რაც გზაზე შეხვდება.

ბრძოლას პროპორციული საარჩევნო სისტემისთვის და არჩევნებისთვის მზადებას უგულავა ღამის მეფისა და თეთრი მოხეტიალების წინააღმდეგ გალაშქრებას ადარებს და მათ პროტოტიპებად ბიძინა ივანიშვილსა და ქართულ ოცნებას ასახელებს. მისი განმარტებით, სწორედ მაშინ, როცა "ბოროტების" წინააღდეგ შვიდი სამეფოს ლაშქარი შეიკრიბა, სააკაშვილი მოიქცა სერსეი ლანისტერივით და მათ ზურგში მახვილი ჩასცა.

"სააკაშვილის ჩარევამდე ოპოზიტიური მოდელი სატახტოთა თამაშების, Game of Thrones-ის მიხედვით რომ აღვწეროთ, იყო შემდეგი: ყველა პარტია ცენტრსა და ფლანგებში განლაგებული ლაშქარივით, ხოლო ლიდერები მაჟორიტარებად. მარტივად, ადამიანები წყვდიადის მეფისა და თეთრი მოხეტიალების, ანუ ბიძინა ივანიშვილისა და ქოცების წინააღდეგ.

ახლა ომის წინა სცენა გვექნებოდა, როცა ბევრი ერთმანეთთან წარსულში დაპირისპირებული ლიდერი წყვდიადის ზომბების წინააღმდეგ ბრძოლისთვის შეხმატკილებულად ემზადება. სააკაშვილი ამ სცენარში მოიქცა როგორს სერსეი ლანისტერი, ზურგში ჩაარტყა დანა ოპოზიციის ერთობას, მხოლოდ საკუთარი ერთპიროვნული ძალაუფლებისთვის", — განაცხადა უგულავამ ვიდეომიმართვაში, სადაც აცხადებს, რომ ოპოზიციური ერთობა მიხეილ სააკაშვილმა და ვანო მერაბიშვილმა დააზარალეს.