სამართლიანი არჩევნებში (ISFED) კოვიდ-პანდემიის მართვაში ჩართული ექიმებისთვის ხელფასის 50%-ით გაზრდას არჩევნების კონტექსტში მიღებულ გადაწყვეტილებად აფასებენ. ორგანიზაციის აღმასრულებელი დირექტორი, ელენე ნიჟარაძე On.ge-სთან განმარტავს, რომ ეს შეიძლება ადმინისტრაციული რესურსის გამოყენების კუთხითაც იყოს განხილული, ვინაიდან, მისივე თქმით, ეს არის ის რესურსი, რომელზეც ხელი სახელისუფლებო პარტიას მიუწვდება.

"მაგალითად, ოპოზიციური პარტიები ასეთ გადაწყვეტილებას ვერ გააჟღერებენ. კორონავირუსი დიდი ხანია პრობლემას წარმოადგენს. საგანგებო მდგომარეობა იყო და მაშინ არ ყოფილა გადაწყვეტილება გაჟღერებული. ზოგადად, ხელფასების მატება პოზიტიურია, მაგრამ იმის გათვალისწინებით, რომ გვაქვს საკმაოდ აქტიური წინასაარჩევნო კამპანია, სამი კვირაა არჩევნებამდე დარჩენილი, რა თქმა უნდა, ეს გადაწყვეტილება ტოვებს შთაბეჭდილებას, რომ არჩევნების კონტექსტში იქნა მიღებული, რათა ამ ამომრჩევლებზე კეთილგანწყობა მოიპოვონ", — ამბობს ელენე ნიჟარაძე.

გადაწყვეტილება იმის შესახებ, რომ ეპიდემიის მართვაში ჩართულ ექიმებს ხელფასის 50%-იანი ზრდა ექნებათ, ჯანდაცვის მინისტრმა, ეკატერინე ტიკარაძემ დღეს საკოორდინაციო საბჭოს სხდომის დასრულების შემდეგ გამართულ ბრიფინგზე განაცხადა. ტიკარაძემ დღეს დანამატი ახსენა, თუმცა On.ge-ს ჯანდაცვის სამინისტროში უთხრეს, რომ საუბარია ხელფასის ზრდაზე.