პრემიერმინისტრმა გიორგი გახარიამ PCR ტესტირების ჩატარების პროტოკოლზე ისაუბრა და განმარტა, რატომ არ უტარდებათ ტესტი ინფიცირებულთან კონტაქტში მყოფ ადამიანებს სიმპტომების გამოვლენამდე. მან ამის მთავარ მიზეზად ის დაასახელა, რომ ტესტების რესურსი "შეუზღუდავი არ არის". გახარიას თქმით, ტესტირება უნდა იყოს მიზნობრივი და სისტემური.

"ამ ტესტის კეთების რესურსი შეუზღუდავი არ არის და უნდა იყოს მიზნობრივი. ამიტომ, ჩვენ ვამბობთ, რომ მიზნობრივი ტესტირება და სისტემური ტესტირება. მიზნობრივი ტესტირება ნიშნავს იმას, როდესაც ადამიანს უჩნდება პირველი სიმპტომები, პირველი ჩვენებები და, რა თქმა უნდა, ის შესაბამისი ინფრასტრუქტურით უნდა გაიტესტოს", — განაცხადა გახარიამ.

პრემიერმინისტრი, ასევე, სისტემური ტესტირების მნიშვნელობას განმარტავს და ამბობს, რომ ეს კონკრეტული სოციალური ჯგუფების ტესტირებაა, მაგალითად მასწავლებლების, პოლიციელების, მძღოლების და ა.შ. თუმცა გახარია, ასევე აცხადებს, რომ ყველაზე მნიშნელოვანი ტესტირების ნაწილში ექიმების ტესტირებაა, რათა ინფიცირების ტალღები ექიმებს შორის პრევენციულად იყოს შეჩერებული.

ახალი პროტოკოლით, კორონავირუსით ინფიცირებულებთან კონტაქტში მყოფ ადამიანებს PCR ტესტირება სიმპტომების გამოვლენამდე არ უტარდებათ. ისინი თვითიზოლაციაში უნდა გადავიდნენ.