13 წლის ილია ფილფანს ინტერპოლის ყვითელი ცირკულარით ეძებენ. მოზარდი სვანეთში ისვენებდა, როცა 18 ივლისს დილით ველოსიპედით სახლიდან გავიდა და მას შემდეგ აღარ დაბრუნებულა.

ილია ფილფანის ძებნის სამუშაოები ჩატარდა ანაკლიასა და ურეკშიც, რადგან, როგორც ოჯახში ამბობენ, მოზარდი ზღვისპირეთში რამდენჯერმე ისვენებდა მამასთან ერთად და არსებობს ვარაუდი, რომ შესაძლოა იქ წასულიყო.

ბიჭის მოძებნისთვის ინტერპოლის ჩართვა ოჯახმა ჯერ კიდევ სექტემბრის დასაწყისში მოითხოვა.

"არავითარი ვიდეო და სატელეფონი ჩანაწერი არ მოიძებნა, რომელიც გვიჩენს ვარაუდს, რომ ბიჭი, შესაძლოა, ქვეყნის საზღვრებს გარეთ გაცდა ან გაიყვანეს. მოგეხსენებათ, აფხაზეთისა და ცხინვალის რეგიონთან ე.წ საზღვარი არ კონტროლდება. შესაძლოა, სწორედ იქ იყოს, თუმცა მოზარდი დამოუკიდებლად საზღვარს ვერ დატოვებდა", — განაცხადა ბავშვის მამამ.

მოზარდის გაუჩინარებასთან დაკავშირებით, გამოძიება სისხლის სამართლის კოდექსის 143-ე მუხლის მე-3 ნაწილის "დ" ქვეპუნქტით დაიწყო, რაც გულისხმობს დამნაშავისთვის წინასწარი შეცნობით არასრულწლოვნის თავისუფლების უკანონო აღკვეთას.