პრემიერმინისტრის, გიორგი გახარიას აზრით, ქართული ოცნების ლიდერის, ბიძინა ივანიშვილის ხელწერა და ღვაწლი თბილისის ცენტრალური პარკის ახალ პროექტშიც გამოჩნდა. მისი თქმით, "ეს არის უაღრესად მნიშვნელოვანი ხელწერა, თუ როგორ შეიძლება პირადით ემსახურო საზოგადოს".

"რა თქმა უნდა, ამ ხელწერის გამომსახველი არ არის მხოლოდ თბილისის ცენტრაული პარკი. ჩვენ შეგვიძლია გავიხსენოთ ბათუმის ბოტანიკური პარკი, თბილისის ბოტანიკური პარკი, დენდროლოგიური პარკი, ახლა ცენტრალური პარკი და რა თქმა უნდა, არ უნდა დაგვავიწყდეს მთაწმინდის გამწვანების პროექტი. ეს ყველაფერი ეკოლოგიური კომპონენტის გარდა შეიცავს თითოეული ჩვენი მოქალაქის, ამ ქვეყნის მოქალაქეების ცხოვრების სტილის ცვლილებას, ჩვენ გვექნება უბრალოდ ისეთი სივრცეები, სადაც ჩვენი ბავშვები გაიზრდებიან', — განაცხადა გახარიამ თბილისის ცენტრალური პარკის პრეზენტაციაზე.

ბოლოს მან აღნიშნა, პანდემიის პირობებში რაოდენ დიდი მნიშვნელობა აქვს მწვანე ზონების მოწყობას მთელი ქვეყნის მასშტაბით და ბიძინა ივანიშვილის "ქველმოქმედებას", მადლობა კიდევ ერთხელ გადაუხადა.

5 ოქტომბერს, თბილისის მერიამ გაავრცელა ინფორმაცია, რომ ყოფილი პრემიერმინისტრი და ქართული ოცნების ლიდერი, ბიძინა ივანიშვილი ქალაქს იპოდრომს გადასცემს, სადაც ფონდი ქართუს დახმარებით გაშენდება თბილისის ცენტრალური პარკი, რომელიც რამდენიმე ათეული მილიონი დაჯდება.